Cümə axşamı, 18 Yanvar 2018

 

17.01.2018. Dağlıq Qarabağ münaqişəsi zonasında yeni gərginlik regional fəlakətə çevrilə bilər.

Musavat.com-un Trend-ə istinadən verdiyi məlumatına görə, bunu Beynəlxalq Böhran Qrupu proqramının Avropa və Mərkəzi Asiya üzrə rəhbəri Maqdalena Qrono "Dağlıq Qarabağda siyasət və təhlükəsizlik bir-birini girov saxlayır" adlı məqaləsində qeyd edib.

M.Qrono qeyd edib ki, Ermənistan və Azərbaycanın müvafiq olaraq Rusiya və Türkiyə ilə müdafiə, strateji tərəfdaşlıq və qarşılıqlı dəstək üzrə müqavilələrini nəzərə alsaq, ən pis halda regional fəlakətə səbəb olacaq yeni gərginliyin qarşısını diplomatiyanın ala biləcəyinə dair ümid var.

O, həmçinin qeyd edib ki, yanvarın 18-də Azərbaycan və Ermənistanın xarici işlər nazirləri arasında keçiriləcək görüşdə ATƏT müşahidəçilərinin sayının artırılması məsələsi müzakirə ediləcək.

M.Qrono xatırladıb ki, Azərbaycan və Ermənistan prezidentlərinin ötən ilin oktyabrında keçirilən görüşü zamanı onlar substantiv danışıqların aparılmasına, təhlükəsizlik və etimad yaratma tədbirlərinə sadiqliklərini bəyan ediblər:

"Lakin belə bir risk də var ki, görüşlər nəticəsiz olarsa, bu, diplomatik danışıqların pozulmasına, münaqişənin güc yolu ilə həllinin düşünülməsinə gətirib çıxara bilər. Bundan yayınmaq üçün təhlükəsizlik sahəsində irəliləyiş əldə olunmalı, eyni zamanda, siyasi müzakirələr bərpa edilməlidir. Ancaq bir çox münaqişələrdə olduğu kimi, siyasət və təhlükəsizlik bir-birini girov alıb. Ermənistan tərəfi münaqişənin gələcək həllində substantiv danışıqların bərpasından öncə təhlükəsizlik və etimad yaratma tədbirlərinin görülməsini təkid edir. Azərbaycan isə öz növbəsində, gələcək razılaşma üzrə danışıqlar aparmadan "status-kvo"nun möhkəmlənməsindən narahat olaraq, Ermənistanın istədiyi tədbirlərə həvəssiz yanaşır”.

www.trend.az

17.01.2018. Ermənistan prezidentliyinə yeni namizədin adı açıqlanıb.

“Report” “Jamanak”a istinadən xəbər verir ki, bu posta Yerevanın Britaniyadakı səfiri Armen Sarqsyanın namizədliyi irəli sürüləcək.

Onun artıq Ermənistanda olduğu, son günlər bir neçə görüş keçirdiyi bildirilib. Xüsusilə hazırkı prezident Serj Sarqsyanın yaxın adamları və onun siyasi kursunu dəstəkləyənlər səfirlə görüşürlər.

A.Sarqsyan 1996-cı ilin dekabrından 1997-ci ilin fevralınadək Ermənistanın baş naziri olub. 2013-cü ildən ölkəsinin Böyük Britaniyadakı səfiridir.

64 yaşlı A.Sarqsyanın Türkmənistan və Özbəkistanda biznesi var. Onun Yaxın Şərqdə və Britaniyada yaxşı çevrəsinin olduğu haqda məlumat yayılıb. Ona görə də ehtimal olunur ki, o həm də erməni diasporu və lobbisinin prezidentliyə namizədi ola bilər.

A.Sarqsyanın namizədliyinin hakim "Ermənistan Respublikaçılar Partiyası"ndan irəli sürüləcəyi ehtimal edilir. Ermənistanın xarici işlər naziri Edvard Nalbandyanın da adı namizədlər sırasında hallanır.

Mütəxəssislər hesab edirlər ki, Rusiya, xüsusilə ölkənin xarici işlər naziri Sergey Lavrov onun namizədliyini müdafiə edir. 2016-cı il avqustun 26-da Rusiya prezidenti E.Nalbandyanı “Dostluq” ordeni ilə təltif edib.

Bununla belə, onun prezident postu tutmaq istəməməsi barədə də məlumatlar yayılır. Ehtimal edilir ki, aprelin 9-dan sonra formalaşdırılacaq hökumətdə o, yenidən xarici işlər naziri olacaq və bu, hazırki XİN başçısı üçün ən yaxşı varinatdı. Çünki bu zaman E.Nalbandyan daha çox sərbəst olur və xarici ölkələri səyahət edə bilir. O, təqaüdə çıxdıqdan sonra Ermənistanın Fransadakı səfiri olmaq arzusundadır.

Qeyd edək ki, Ermənistan parlameti martın 2-də yeni prezident seçəcək.

www.report.az

17.01.2018. Ermənistan prezidenti Serj Sərkisyan gələcək dövlət başçısını necə təsəvvür etdiyini açıqlayıb.

Aprelin 9-da Serj Sərkisyanın səlahiyyət müddəti başa çatır. Həmin gün ölkə tam parlament idarə üsuluna keçir, icra hakimiyyətinə baş nazir rəhbərlik edir.

Yalnız dövlət başçısı funksiyası daşıyan prezidenti isə parlament 7 il müddətinə seçəcək. 40 yaşa çatmış, son 6 ildə yalnız Ermənistan vətəndaşı olmuş və həmin dövr ərzində ölkədə daimi yaşamış, erməni dilini bilən şəxs prezident seçilə bilər.

Novator.az-ın məlumatına görə, yanvarın 16-da ziyalılarla görüşən Serj Sərkisyan deyib ki, Ermənistanın gələcək prezidenti bir neçə xarici dil bilməli, həm diasporda, həm də ölkədə geniş əlaqələrə malik olmalı, bu dairələrdə böyük nüfuzu ilə seçilməlidir: “Ən əsası da o, tərəfsiz şəxs, əvvəllər heç vaxt siyasətlə məşğul olmamış, heç bir partiyanın üzvü olmamış şəxs olmalıdır”.

Serj Sərkisyan qeyd edib ki, yeni prezident zəngin keçmişə malik, uzun yol qət etmiş, ölkəni beynəlxalq səviyyədə ləyaqətlə təmsil edə biləcək, həm daxildə, həm də xaricdə tanınan bir insan olmalıdır: “Yəni o həm daxildə, həm də ölkə hüdudlarından kənarda təmsilçilik funksiyalarını yerinə yetirməyə qadir olmalıdır”.

www.Novator.az

img

17.01.2018. Xarici işlər naziri Elmar Məmmədyarov Fransaya işgüzar səfəri çərçivəsində Fransa Prezidentinin diplomatik məsələlər üzrə müşaviri Filip Etien ilə görüşüb. Nazirlikdən Trend-ə verilən məlumata görə, görüşdə iki ölkə arasında siyasi dialoqun inkişafından məmnunluq ifadə olunub və yüksək səviyyəli qarşılıqlı səfərlərin əlaqələrin inkişafına töhfə verdiyi vurğulanıb.

Nazir həmsöhbətə Ermənistan-Azərbaycan Dağlıq Qarabağ münaqişəsinin həlli üzrə aparılan danışıqlar prosesi haqda geniş məlumat verib və münaqişənin həllinə dair Azərbaycanın beynəlxalq hüququn norma və prinsiplərinə əsaslanan ədalətli mövqeyini bir daha diqqətə çatdırıb.

Görüşdə iki ölkə arasında humanitar və iqtisadi-ticarət əlaqələrinin inkişafı təqdir edilib. Bu xüsusda, Bakıda Birgə Azərbaycan-Fransız Universiteti, Fransiz liseyinin fəaliyyəti, fransız dilinin tədrisinə göstərilən dəstək, tələbə mübadiləsi, iki ölkənin regionlar arasında əlaqələrin yaradılması, ticarət əlaqələrinin genişlənməsi qeyd edilib.

E.Məmmədyarov həmsöhbətə Azərbaycanın təşəbbüsü və dəstəyi ilə regionda həyata keçirilən nəqliyyat və enerji layihələri, ölkəmizdə qeyri-neft sektorunun inkişafı istiqamətində görülən tədbirlər və aparılan köklü islahatlar haqqında danışıb. O, Fransa şirkətlərini Azərbaycanın qeyri-neft sektorunda daha yaxından təmsil olunmağa dəvət edib.

Tərəflər Azərbaycanın Avropa İttifaqı ilə əlaqələrinin inkişafına Fransanın göstərdiyi dəstəyi məmnunluqla qeyd ediblər.

Görüş əsnasında Azərbaycanın multikulturalizm ənənələri, mədəniyyətlər və dinlərarası dialoqa verdiyi töhfələri yüksək qiymətləndirilib.

Həmçinin, görüşdə regional və qlobal məsələlər ətrafında fikir mübadiləsi aparılıb.

www.trend.az

img

17.01.2018. Yanvarın 18-də Azərbaycan və Ermənistan xarici işlər nazirləri arasında keçiriləcək görüşdə ATƏT müşahidəçilərinin sayının artırılması məsələsi müzakirə ediləcək. APA-nın məlumatına görə, bu barədə Beynəlxalq Böhran Qrupunun (BBQ) Dağlıq Qarabağ münaqişəsi ilə bağlı yayımladığı son məqalədə deyilir.

Məqalənin müəllifi, BBQ-nun Avropa və Mərkəzi Asiya üzrə proqram direktoru Maqdalena Qrono bu məlumatı sülh prosesinə yaxın diplomatdan əldə etdiyini qeyd edir: “Tərəflər hələ də şərtlərlə bağlı razılığa gəlməyib. Bakı hazırkı ofisdə hər hansı dəyişiklik olmadan, yüngül dəyişikliklərin edildiyi razılaşma istəyir. Ermənistan yeni heyət və yeni məsuliyyətlərlə birlikdə daha geniş razılaşma tərəfdarıdır. Dağlıq Qarabağda isə daha çox təmas xəttinin sıx məskunlaşmış hissəsində daimi ATƏT müşahidəçilərinin olmasını istəyirlər. Onlar etimad tədbirləri qismində araşdırma mexanizmlərinin işə salınması ehtimalının daha aşağı olduğunu deyir”.

Müəllif yazır ki, Azərbaycan və Ermənistan prezidentlərinin ötən ilin oktyabrında keçirilən görüşü zamanı onlar substantiv danışıqların aparılmasına, təhlükəsizlik və etimad yaratma tədbirlərinə sadiqliklərini bəyan ediblər: “Artıq yeni ümidlər yaranıb ki, diplomatiya yeni eskalasiyanın qarşısını ala bilər. Lakin belə bir risk də var ki, görüşlər nəticəsiz olarsa, bu, diplomatik danışıqların pozulmasına, münaqişənin güc yolu ilə həllinin düşünülməsinə gətirib çıxara bilər. Bundan yayınmaq üçün təhlükəsizlik sahəsində irəliləyiş əldə olunmalı, eyni zamanda siyasi müzakirələr bərpa edilməlidir. Lakin bir çox münaqişədə olduğu kimi, siyasət və təhlükəsizlik bir-birini əsir alıb. Ermənistan tərəfi münaqişənin gələcək həllində substantiv danışıqların bərpasından öncə təhlükəsizlik və etimadyaradıcı tədbirlərin görülməsini təkid edir. Azərbaycan isə öz növbəsində gələcək razılaşma üzrə danışıqlar aparmadan "status-kvo"nun möhkəmlənməsindən narahat olaraq, Ermənistanın istədiyi tədbirlərə həvəssiz yanaşır”.

www.apa.az

img

17.01.2018. BMT-nin Baş katibi Antonio Quterreş tərəfindən BMT Baş Assambleyasının 16 yanvar tarixli qeyri-rəsmi iclasında Avropada mövcud olan münaqişələr sırasında Ermənistan-Azərbaycan Dağlıq Qarabağ münaqişəsinin həlli üzrə ATƏT-in Minsk Qrupunun fəaliyyətinin canlandırılması üzrə çağırışını təqdir edir və dəstəkləyirik. Bunu Xarici İşlər Nazirliyinin (XİN) mətbuat xidmətinin rəhbəri Hikmət Hacıyev bildirib.

H.Hacıyevin sözlərinə görə, BMT Baş katibi tərəfindən çox düzgün olaraq qeyd olunur ki, Avropada mövcud olan resurslar, imkanlar və təsisatların fonunda münaqişələrin həll edilməmiş formada qalmasına bəraət qazandırıla bilməz: "Avropada təhlükəsizliyin bölünməzliyi vahid prinsip kimi qəbul olunsa da, təəssüf ki, reallıq bundan tamamilə uzaqdır.

80-ci illərin sonunda Azərbaycanın Dağlıq Qarabağ regionunda başlayan aqressiv erməni separatismi Ermənistanın Azərbaycana qarşı hərbi təcavüzü və ölkəmizin ərazilərinin 20 faizinin işğalı və bir milyondan artıq azərbaycanlılının qanlı etnik təmizlənməsi ilə nəticələnib. BMT Nizamnaməsi, Helsinki Yekun Aktı ilə üzərinə götürdüyü öhdəliklərinə zidd şəkildə ATƏT üzv ölkəsi olaraq Ermənistanın digər ATƏT üzv ölkəsi olan Azərbaycanın ərazilərinin işğalını davam etdirməsi regional sülh və təhlükəsizliyə ciddi təhdid olaraq qalmaqda davam edir. BMT Təhlükəsizlik Şurasının 822, 853, 874 və 884 saylı qətnamələri Ermənistan qoşunlarının Azərbaycanın işğal olunmuş ərazilərindən tam və qeyd-şərtsiz çıxarılmasına tələb etdiyi halda, Ermənistan buna məhəl qoymur. Ermənistanın bu kimi işğalçılıq siyasəti, güc tətbiq edərək ərazi əldə edilməsi cəhdləri XX əsrin 30-40-cı illərində Avropada baş qaldıran mənfur təcrübə ilə müqayisə oluna bilər".

H.Hacıyev qeyd edib ki, Azərbaycan, ATƏT-in Minsk Qrupunun həmsədrlərinin mandatını təşkil edən BMT Təhlükəsizlik Şurasının müvafiq qətnamələri və Helsinki Yekun Aktı əsasında Ermənistan-Azərbaycan Dağlıq Qarabağ münaqişəsinin həlli və regionda davamlı sülhün və təhlükəsizliyin təmin olunması üçün həmsədrlər və beynəlxalq ictimaiyyət ilə birgə səylərini davam etdirəcək.

www.bak-xeber.com

img

17.01.2018. İtaliyanın Minsk Qrupunun ilk sədri təcrübəsi və Alto Adice modeli Dağlıq Qarabağ münaqişəsinin həllinə töhfə verə bilər. “Trend”in məlumatına görə, bu fikirlər İtaliyanın nüfuzlu “İl Giornale” qəzetində “Nodo di Gordio” beyin mərkəzinin baş tədqiqatçısı, professor Andrea Marçilianonun müəllifi olduğu İtaliyanın ATƏT-ə sədrliyindən Ermənistan-Azərbaycan Dağlıq Qarabağ münqaişəsinin nizamlanması üçün gözləntilərə dair “İtaliya ATƏT-də. Qafqazın gələcəyi üçün ümidlər və perspektivlər” adlı məqaləsində yer alıb.

Məqaləsində müəllif bildirir ki, İtaliyanın 2018-ci ildə ATƏT-ə sədrlik edəcəyi ilə bağlı xəbər siyasi seçkilər və iqtisadi debatlar mövzusu ilə həddən artıq yüklənmiş yerli media tərəfindən faktiki olaraq sükutla qarşılansa da, söhbət böyük əhəmiyyətə malik olan və İtaliyanı beynəlxalq ictimaiyyətin diqqət mərkəzinə çevirən hadisədən gedir və çoxlu “isti dosyelər”in mövcudluğu ATƏT-ə sədrliyin İtaliyaya beynəlxalq səhnədə böyük nüfuz qazanmaq və öz maraqlarını da qorumaq üçün əlverişli imkan yaradır.

Fikirlərinə davam edən müəllif qeyd edir ki, İtaliyanın ATƏT-ə sədrliyi dövründə üzləşəcəyi ilk məsələlərdən biri uzun illər davam edən Ermənistan-Azərbaycan Dağlıq Qarabağ münaqişədir. Münaqişənin tarixi barədə danışan müəllif onun baş verməsinin SSRİ-nin son illərinə təsadüf etdiyini, tarixən Azərbaycanın ərazisi olan Dağlıq Qarabağdakı erməni icmasının bölgənin Ermənistana verilməsi iddiası ilə çıxış etdiyini, bunun Ermənistan tərəfindən dəstəkləndiyini, Ermənistan silahlı qüvvələrinin üçüncü tərəflərin hərbi köməyi ilə yalnız Dağlıq Qarabağı deyil, eləcə də Azərbaycanın digər yeddi rayonunu işğal etdiyini, həqiqi mənada əsl “etnik təmizləmə” həyata keçirərək bir milyondan çox azərbaycanlını didərgin saldığını, Avropanın isə buna çarəsizcəsinə şahidlik etdiyini qeyd edir. Vəziyyətin hələ də dəyişmədiyini və dövri olaraq alovlanan bu “dondurulmuş” münaqişənin davam etdiyini yazan müəllif vurğulayır ki, hərbi işğalı pisləyən, qaçqınların və məcburi köçkünlərin öz yurd-yuvalarına qayıtmasını, Azərbaycanın işğal olunmuş ərazilər üzərində suverenliyini bərpa etməsini və danışıqlar yolu ilə münaqişənin həllini tələb edən BMT-nin çoxsaylı qətnamələrinə, müxtəlif beynəlxalq qurumların sənədlərinə baxmayaraq, indiyə qədər heç bir nəticə əldə olunmayıb, eyni zamanda bu problemi həll etmək üçün BMT mandatı ilə təsis olunmuş ATƏT-in Minsk Qrupu da bu qrupun həmsədrləri olan Fransa, Rusiya və ABŞ-ın hər birinin xüsusi maraqları ucbatından, demək olar ki, iflic vəziyyətinə düşüb.

Müəllif yazır ki, Minsk Qrupunun üzvü olan İtaliya vaxtilə bu qrupun ilk sədri kimi Bakı və İrəvan arasında münaqişənin həll olunması üçün təkliflər irəli sürüb və BMT Təhlükəsizlik Şurasının qətnamələrinə müvafiq olaraq Ermənistan qoşunlarının Azərbaycanın işğal olunmuş ərazilərindən çıxarılmasını nəzərdə tutan təcili tədbirlər haqqında vaxt cədvəlini hazırlayıb, təəssüf ki, bu təkliflərə məhəl qoyulmayıb.

Bu təcrübədən irəli gələrək, İtaliyanın özünün Alto Adice modelini təklif etməklə münaqişənin həllinə töhfə verə biləcəyini bildirən müəllif bu həllin işğal edilmiş ərazilərin Azərbaycana qaytarılması, Azərbaycanın ərazi bütövlüyünün təmin olunması, azərbaycanlı qaçqın və məcburi köçkünlərin öz doğma evlərinə geri qayıtması və paralel olaraq Azərbaycan Respublikasının tərkibində Dağlıq Qarabağa beynəlxalq zəmanətlə erməni azlığının təhlükəsizliyinə təminat verən geniş muxtariyyətin verilməsindən ibarət ola biləcəyini yazır. Alto Adicenin belə bir muxtariyyət statusunun olduğunu yazan müəllif bu regionda yaşayan almandilli azlıq olan əhalinin bütün beynəlxalq müşahidəçilər tərəfindən Avropada ən çox qorunan azlıq hesab edildiyini qeyd edir.

Bu səbəblərdən Romanın ATƏT-ə sədrliyinin çoxlu gözlənti və perspektivlər doğurduğunu vurğulayan müəllif yazır ki, bu xüsusda rəsmi Bakı ATƏT-in fəaliyyətdə olan sədri kimi İtaliyanın prioritetləri sırasına bu münaqişənin həllinin daxil edilməsini müsbət qiymətləndirib, Minsk Qrupunun ilk sədri kimi İtaliyanın o zamankı təkliflərini xatırladaraq, ATƏT-in fəaliyyətdə olan sədri statusunda İtaliyanın BMT-nin müvafiq qətnamələrinin tələblərinin yerinə yetirilməsi üçün öz mövqeyində davamlılıq nümayiş etdirəcəyinə ümid etdiyini bildirib, habelə “Helsinki ruhu”nu bərpa etmək və münaqişələrin dinc yolla həllinə nail olmaq üçün əsas şərt kimi bütün iştirakçı dövlətlər tərəfindən ATƏT-in prinsip və öhdəliklərinə tam riayət olunmasına çağırış edib.

Azərbaycan və İtaliya arasında möhkəm münasibətlərin mövcudluğundan yazan müəllif ölkəmizin İtaliyanın əsas neft təchizatçısı olduğunu, neftin Bakı-Tiflis-Ceyhan boru kəməri vasitəsilə nəql edildiyini, habelə Xəzər dənizinin Azərbaycan sektorundan Cənubi Qaz Dəhlizinin başladığını, bu dəhlizin son hissəsi olan Trans Adriatik Boru Kəmərinin (TAP) İtaliyanı bütün Cənubi Avropaya təbii qaz nəqli üçün əsas qovşağa çevirəcəyini bildirir. Dağlıq Qarabağ münaqişəsinə son qoymaqla bütün Qafqaz regionunda sülhü təmin etməyin həm də dünyanın geosiyasi tarazlığı üçün vacibliyini bildirən müəllif Qafqaz, xüsusilə də Azərbaycanın yeni nəqliyyat və kommunikasiya xətlərində strateji rol oynadığını vurğulayır, yenicə fəaliyyətə başlamış Bakı-Tiflis-Qars dəmiryolunun əhəmiyyətindən danışlaraq bu dəmir yolunun Çinin şərqini Aralıq dənizi hövzəsi ilə əlaqələndirərək, bütün Avrasiya sistemini hərəkətə gətirəcəyini, bu xəttin Aralıq dənizi və bütöv Avropanın gələcək rifahının asılı olacağı “Bir kəmər, bir yol”, İpək Yolu 2.0 kimi nəhəng layihənin tərkib hissəsi olduğunu yazır. Müəllif bütün bu kommunikasiya və enerji təchizatı xətlərinin Dağlıq Qarabağ münaqişəsi zonasına yaxın ərazilərdən keçdiyini və hərbi əməliyyatların bərpası halında bütün bu infrastrukturun qarşısıalınmaz zərərə məruz qala biləcəyini qeyd edir. Sonda o vurğulayır ki, Ermənistanda ictimai rəyə təsir göstərən qüvvələr bu gün Qafqazda gedən inkişaf proseslərindən münaqişə ucbatından təcrid olunmağın İrəvana vurduğu zərər barədə xəbərdarlıq etməyə başlayıblar ki, bu məqam da münaqişənin diplomatik həllinə imkanlar aça bilər.

www.trend.az

 

 

 17.01.2018. “Aşıq Şəmşir” Mədəniyyət Ocağı İctimai birliyinin təşkilatçılığı ilə Kəlbəcər rayon 21 saylı orta məktəbin şagirdləri Şəhidlər xiyabanını ziyarət ediblər.

 
“Aşıq Şəmşir” Mədəniyyət Ocağı İctimai birliyinin sədr müavini Həbib Misirov xalqın azadlıq mübarizəsindən, 28 il əvvəl Bakıda törədilən qanlı hadisənin səbəblərindən, faciənin ağır nəticələrindən danışıb. Bildirdi ki, müstəqillik uğrunda mübarizə aparan azadlıq mücahidlərimiz şəhidlik zirvəsinə ucalaraq bütün dünyaya sübut etdilər ki, xalqımız öz vətənini canından artıq sevir. Qanlı Yanvar hadisələri xalqımızın qəhrəmanlıq tarixinin ən şanlı səhifəsi olaraq XX əsrin ən dəhşətli qırğınlarından biri kimi tarixə düşüb. Bu hadisəyə siyasi qiymət verilməsində ulu öndər Heydər Əliyevin əvəzsiz xidmətlərin xatırladıb.
 
21 saylı kəlbəcər rayon orta Məktəbin direktoru Xəqani Nadirov bildirib ki, 20 Yanvar xalqın faciəsi olmaqla yanaşı həm də hər bir azərbaycanlının qürur mənbəyidir.
 
Sonra məktəblilər şəhdilərə həsr olunmuş şerlər səsləndirdilər və məzarları üzərinə gül dəstələri düzdülər.
 
www.moderator.az

 

 

 17.01.2018. Artıq bir neçə gündür ki, gənc yazar Kəramət Böyükçölün sosial şəbəkədə Xəlil Rza Ulutürk haqqında yazdığı aşağılayıcı statusu müzakirə olunmaqdadır. Doğrudur, gənc yazar ona yönələn tənqid və təhqirlərə dözməyərək əvvəlcə öz statusunu silib, profilini bağladı və daha sonra yazdıqlarından dolayı üzr istədi. Lakin yaranmış mübahisə və müzakirələr səngimək bilmir.

 
Qeyd edək ki, bəziləri, hətta gənc yazarın atası Qəşəm Nəcəfzadə də oğlunun Zərdüşt Əlizadədən “zəhərləndiyini”, onun təsiri altında düşdüyünü bildirir. Həqiqətən də bir müddət bundan əvvəl Zərdüşt Əlizadə gənc yazara verdiyi müsahibəsində eynilə həmin fikirləri səsləndirmişdi. Lakin maraqlıdır ki, zamanında həmin fikirlərə qarşı bu qədər reaksiya və tənqidlər olmamışdı. Beləliklə gənc yazar səsləndirdiyi fikirlərə görə meydanda tək qaldı, hətta “təsiri altında düşdüyü” Zərdüşt Əlizadə tərəfindən də dəstək almadı.
 
Mövzu ilə bağlı musavat.com-un əməkdaşı politoloq Zərdüşt Əlizadənin mövqeyini öyrənməyə çalışıb.
 
Politoloq qalmaqala bu cür reaksiya verib: “Var tarix, var əfsanə... Xəlil Rza Ulutürk bütün Azərbaycan xalqının, Bakı əhalisinin gözü qarşısında meydanda qızışdırıcı çıxşlar edirdi. Bu qızışdırıcı çıxışlarda ermənilərə nifrət, onlara qarğış, hədələr və sair var idi. Soruşuram, bu, Azərbaycan xalqına, ya ermənilərə xeyir idi? Əlbəttə ki, yox... Bu, imperiya mərkəzinə, Rusiyaya xeyir idi. Rusiya bu münaqişəni qızışdırdı, sonra gətirilib çıxarıldı, qanlı mərhələyə, sonra isə Azərbaycanı idarə etməyə başladı. Münaqişə zamanı xeyli insan həlak oldu. İndi bu münaqişəni qızışdıranların günahı var, ya yox?
 
Mən Xəlil Rza Ulutürkün məhkəmə prosesində olmuşdum. Onda Moskvadan bura gətirib, onu mühakimə edirdilər. Həbsxanadan çıxdıqdan sonra yenə də başladı nifrətə, qarğışa... Şairdir, şeir söyləməyi bacarır. O, ermənilərə çox bədii qarğışlar yağdırdı. Nəticədə nə oldu, 14 min azərbaycanlı, 600 erməni həlak oldu, biz Qarabağı itirdik. O cümlədən, onun oğlu da şəhid oldu.
 
O şairlər, alimlər ki, ermənilərə qarşı nifrət dalğası qaldırırdı, hansı ki, indi də bu baş verir, onlar imperiya mərkəzinə qulluq edirlər. Onlar bundan maddi qazanc da əldə edirlər”.
 
Zərdüşt Əlizadə gənc yazarın “ondan zəhərlənərək” status yazdığı iddiasına isə bu cür şərh verib: “Məndən zəhərlənmək lazım deyil. Gedib sadəcə, o zamankı videolara baxmaq lazımdır. Hansı ki, həmin videolarda Xəlil Rza Ulutürk ermənilərə qarşı od püskürür. Yəni ziyalı kimi ağıllı olsaydı, barışa, sülhə çağırışlar edərdi. Atəşkəs dövründə də 4 minə yaxın insanımız həlak oldu. İndi müharibə deyən insanlara əhsən deyək?”
 
“Niyə Kəramət Böyükçölə dəstək olmadız” sualımızı isə Zərdüşt Əlizadə belə cavablandırdı: “Ümumiyyətlə, məni kimsə sosial şəbəkədə görüb? Mən bəzi saytlara məqalələr yazıram. Vaxtım hardadır ki, sosial şəbəkələrdə oturum? Vaxtilə xalqa dediyimi demişəm. Xalq isə getdi, başqalarının yanına və bu günə düşdü. Əgər, xalq bu gününü xoşlayırsa, deməli, buna layiq idi, vəssalam!”
 
www.musavat.com

 

 

 17.01.2018. ABŞ, Sinqapur və Livanın tanınmış təşkilat rəhbərləri ilə görüşdə millət vəkili Q.Paşayeva ölkəmizin Birinci vitse-prezidenti Mehriban Əliyeva başda olmaqla Azərbaycan qadınlarının cəmiyyətdə rolu barədə danışıb, Azərbaycan həqiqətləri ilə bağlı məlumatlar verib. 

 
Azərbaycanın iqtisadi və turizm potensialı, mədəniyyəti, mədəniyyətlər və sivilizasiyalararası dialoqa verdiyi böyük önəm barədə geniş məlumatlar verən millət vəkili ölkəmizin ən ağrılı məsələsi olan Qarabağ problemi və Xocalı Soyqırımı barədə də geniş danışıb. Q.Paşayeva onlara Ermənistanın işğal etdiyi Azərbaycan torpaqlarında törətdiyi vandalizm aktları, 1 milyon azərbaycanlının, yüz minlərlə azərbaycanlı qadının Ermənistanın işğalı nəticəsində öz yurd-yuvalarından qaçqın və məcburi köçkün düşməsi və onların fundamental insan haqlarının bu gün də Ermənistan tərəfindən pozulmaqda davam etməsi, rəsmi İrəvanın yüz minlərlə azərbaycanlı qaçqın və məcburi köçkünün 20 ildən artıqdır ki, öz ev-eşiyinə dönməsinə imkan verməməsi barədə ətraflı məlumatlar verib. O deyib ki, dünyanın harasında yaşamasından asılı olmayaraq bütün qadınlar, xüsusilə də beynəlxalq aləmdə nüfuzlu qadınlar Ermənistanın törətdiyi bu kimi vandalizm aktlarına, körpə uşaqları qətlə yetirməsinə, yüz minlərlə azərbaycanlı qadının Ermənistan tərəfindən pozulmaqda davam edən fundamental insan haqlarına laqeyd, seyrçi qalmamalı və buna qarşı öz etiraz səsini ucaltmalıdır. ABŞ, Sinqapur və Livanın tanınmış təşkilat rəhbərləri də Azərbaycanla əməkdaşlığın, dostluğun inkişafına önəm verdiklərini deyərək münasibətlərin getdikcə inkişaf edəcəyinə inandıqlarını vurğulayıblar. Qadın siyasətçiləri, iş adamları, qeyri-hökumət, KİV nümayəndələri arasında münasibətlərin və qarşılıqlı səfərlərin vacibliyi, münasibətlərin, əməkdaşlığın inkişafı üçün böyük prespektivlər olduğunun vurğulandığı görüşlərdə qarşılıqlı dəstəyin və əməkdaşlığın daha da sürətlənəcəyinə inam vurğulanıb. Millət vəkili Q.Paşayeva görüşün sonunda onlara Azərbaycan mədəniyyəti ilə bağlı hədiyyə və materialları təqdim edib.
 
www.moderator.az

QAT.az