Şənbə, 22 İyul 2017
 
 

22.07.2017. 22 iyul Azərbaycanın Milli Qəhrəmanı Nadir Əliyevin anım günüdür. Modern.az-ın məlumatına görə, o, 1993-cü il iyulun 22-də şəhid olub.

Nadir Əliyev 1962-ci il iyul ayının 30-da Ağdam rayonunun Əliağalı kəndində doğulub. 1977-1981-ci illərdə Bakı PolitexnikTexnikumunda təhsil alıb. 1991-ci ildə DTK-nın F.E.Dzerjinski adına Ali Məktəbini, 1993-cü ildə isə Bakı Dövlət Universitetinin hüquq fakültəsini bitirib. 1991-ci ildən Milli Təhlükəsizlik Nazirliyində həqiqi hərbi xidmətdə olan N.Əliyev 1991-ci ilin sentyabr ayından dekabr ayınadək Azərbaycan DTK-nın (1991-ci ilin noyabr ayından MTN-nin) Ağdərə rayon bölməsində, 1992-ci ildən isə Azərbaycan Respublikası Milli Təhlükəsizlik Nazirliyinin Qarabağ üzrə İdarəsinin Ağdərə Rayon Bölməsində baş əməliyyat müvəkkili işləyib.

Döyüşlərdə iştirakı haqqında danışarkən qeyd edək ki, 1993-cü ilin yanvar ayında MTN-nin Ağdam Rayon Şöbəsinə baş əməliyyat müvəkkili təyin olunub. Ağdərə uğrunda döyüşlərin qızğın dövründə cəbhə bölgəsinə ezam edilməsi üçün könüllü surətdə rəhbərliyə raportla müraciət edib, MTN-nin xüsusi təyinatlı hərbi dəstəsinin tərkibində Ağdərə rayonunun Sırxavənd kəndində gedən döyüşlərdə rəşadət göstərib, Ağdam rayonunun Qiyaslı kəndi uğrunda gedən döyüşlərdə düşmənə əsir düşməmək üçün sonadək müqavimət göstərib və qəhrəmancasına həlak olub.

N.Əliyevin iki övladı qalıb.
Azərbaycan Prezidentinin 9 oktyabr 1994-cü il tarixli, 218 saylı Fərmanı ilə Əliyev Nadir Alış oğlu ölümündən sonra "Azərbaycanın Milli Qəhrəmanı" adına layiq görülüb. Milli Qəhrəman Bakı şəhərinin Şəhidlər Xiyabanında dəfn edilib. Suraxanı rayonundakı 282 saylı orta məktəb qəhrəmanın adını daşıyır. Yaşadığı binanın önünə xatirə lövhəsi vurulub.

Milli Qəhrəmanın oğlu Şəhriyar Əliyev Modern.az saytına müsahibəsində atasını belə xatırlayıb:

"...Atam könüllü olaraq hərbi hissəyə yazılanda anam hiss etdirməməyə çalışsa da, narahat olmuşdu. Çünki bilirdi ki, gedib geri dönməyə də bilər. Hər şeydən öncə bizi düşünürdü. Atam vətənini çox sevirdi və nə olursa-olsun müharibəyə gedəcəkdi. Anam bilirmiş ki, nə qədər buna mane olmağa çalışsa da, onun sözünü dinləməyəcək... Bəzən deyirəm ki, kaş bizim də atamız sevincli günlərimizdə yanımızda olaydı. Mən qazandığım və əldə etdiyim uğurlarımı atamla bağlayıram. Kimsə onunqəhrəmanlıqlarından danışanda mən qürur hissi keçirirəm. Düşünürəm ki, həyatımda örnək alacağım yeganə insan atamdır. Atamın döyüş dostları ilə hər zaman münasibətlərimiz olub və indi də var. Onlar atamın ildönümlərində də bizə gəlib-gedirlər. Mən həm də onların övladları ilə əlaqə saxlayıram. Məni atama çoxoxşadırlar və deyirlər ki, "sənin timsalında sanki atanı görürük". Onlar atamla bağlı bizə çox maraqlı xatirələr danışırlar... Atam çox güclü insan olub. İçində olangüclü vətənpərvərlik hissi onu düşmənə qarşı daha da hirsli, acımasız etmişdi. Atam əsir düşməmək üçün bir çox yollara əl atıb. Amma sonda ayağından yaralanıb və ermənilər tərəfindən pusquya salınaraq öldürülüb.

Döyüş dostları danışırlar ki, o bir çox erməni hərbi bazalarını partladıb. Ona görə də ermənilər atamın başına 1 milyon pul qoymuşdular. Çünki onlara belə birinsanın həyatda olması qətiyyən sərf etmirdi".

www.modern.az

 
 

22.07.2017. Sabah Ağdamın Ermənistan qoşunları tərəfindən işğal olunmasının 24-cü ili tamam olur. 23 iyul 1993-cü il tarixində Erməni Silahlı Qüvvələri Qarabağın ən böyük rayonlarından olan Ağdamı işğal etdilər. Ağdam rayonunun ərazisi 1154 kv.km, əhalisinin sayı isə 165 mindən çoxdur. Rayonun 122 kəndi var ki onların da hazırda 87-si işğal altındadır.

Dağlıq Qarabağ hadisələri başlayandan Ağdam burada cərəyan edən hadisələrin episentri olub. 1992-ci ildən rus ordusuna arxalanan Ermənistan Silahlı Qüvvələri Ağdama olan hücumları daha da intensivləşdirdi. Nəticədə 1993-cü il iyulun 23-də Ağdam şəhəri süquta uğradı. Bundan sonra 1994-cü il mayın 12-dək davam edən hərbi təcavüz nəticəsində ermənilər rayonun 846,7 kvadrat km sahəsini, yəni ümumi ərazisinin 77,4 faizini işğal etməyə nail oldular.

Faktlar ermənilərin Ağdam şəhəri və rayonun işğal altındakı 87 kəndində vəşhicəsinə talan, qarətlə məşğul olduğunu sübut edir. Ağdamın müdafiəsi uğrunda döyüşlərdə 5 min nəfərdən çox azərbaycanlı həlak olub, minlərlə insan fiziki şikəstlik qazandı, rayonun 126 min nəfərdən çox əhalisi öz doğma ev-eşiyindən qovularaq məcburi köçkünə çevrildi.

Ermənilər işğal altında qalan çoxlu sayda tarixi, mədəni və dini abidələri yerlə-yeksan ediblər. Müharibə nəticəsində Ağdam rayonun 538 şəhid verib 587 sakin isə əlil olub. Ağdamda doğulub böyüyən və Qarabağ müharibəsində canını fəda edən 17 nəfər Azərbaycanın Milli Qəhrəmanı adını daşıyır.

 

Modern.az saytının Ağdamın işğal günü ərəfəsindəki həmsöhbəti o faciəni yaşamış ağdamlı,  o zaman rayonda döyüşmüş  Ədalət Məhərrəmovdur.


O, 1993-cü ilin 22 iyulunu ürək ağrısı ilə xatırlayır... 


“Hərbi texnika Ağdamdan çıxarıldı”


“1993-cü ilin 21-22-si iyulunda Ağdamda vəziyyət çox pis idi. Düzü, 1993-cü ilin bu tarixlərinə qayıtmaq çox çətindir. 1993-cü ilin 28 may tarixində müstəqillik günümüzdə ermənilər Ağdama hücum etmişdi. O tarixdən başlayaraq iyulun 23-nə kimi fasiləsiz olaraq Ağdama erməni hücumları olurdu. Həmin vaxtda Ağdamda Talıb Məmmədov adlı briqada komandiri vardı. Çox yaxşı komandir olsa da, sonradan silah-sursatın, hərbi texnikanın Ağdamdan çıxarılıb Murov istiqamətinə aparılmasının qarşısına almadı. O zaman elə hey deyirdilər ki, Gəncə tərəfdən Murova hücum olacaq... 

Ağdamın işğalı ərəfəsində müdafiə naziri Dadaş Rzayev idi. Amma orduda sabitlik yox idi. Kim necə istəyirdisə, elə də hərəkət edirdi.

İyunun 28-də Ağdam uğrunda gedən döyüşlərdə yaralanmışdıq. Bakıdakı hospitalda qalırdıq. Ağdamın işğalına yaxın Bakıdan Ağdama gəldik.

İşğal ərəfəsində kimi “Bozqurd”un, kimi də  “Cəbhə”nin adamı idi. Biz isə  Allahın, torpağın adamı idik. Ağdamın işğalına 20-25 gün qalmış mərhum prezident Heydər  Əliyevin qəbulunda olduq. Ağdamın tanınmış ziyalıları Ağdamın müdafiəsinə çox yaxşı qalxmışdı. Ağdamda çatışmayan nə varsa, hamısını Heydər Əliyevə məruzə etdik. Təbii ki, mərhum lider orduda hərc-mərcliyin baş aldığını açıq söylədi”. 



1993-cü ilin 4 iyun qiyamının Ağdama təsiri

Ədalət Məhərrəmov deyir ki, 4 iyun qiyamı Ağdamın işğal prosesini sürətləndirib. 


“Surət Hüseynovun dəstəsi hay-küylə Ağdama gəldi ki, bəs Ağdamın işğal olunmasına imkan verməyəcəklər. Təbii ki, bu, mümkün olmadı. Surət Hüseynov Ağdamda səhər saatlarında iclas keçirməli idi. Axşam da iclas keçiriləcək yerə mərmi atıldı. Bu xain işi öz ordu hissələrimiz törətmişdi. Nə qədər insan öldü. Bu hadisədən sonra ağdamlılar qorxmağa başladılar. Kazarmada yatmağa kimsə cəsarət etmirdi. Eyni zamanda, Surət Hüseynovun dəstəsində həqiqətən döyüşkən oğullar var idi. Onların çoxunun meyiti döyüş bölgəsində qaldı, götürə bilmədik. Surət Hüseynovun dəstəsində həqiqi döyüşmək gücündə olanlarla bərabər, yeyib-içən, avara, vaxt keçirən adamlar da vardı.
Təəssüf ki, Ağdamın işğal olunmasının ən böyük səbəblərindən biri orduda olan özbaşınalıq idi”.

 

“Biz siyasi oyunlara qarışmadıq”


Ağdamlı döyüşçü deyir ki, Kəlbəcərin işğalı belə, ağdamlıları qorxutmamışdı. Amma...

 

“Ağdamın işğalı ərəfəsində işıq, qaz su problemi vüsət almamışdı. Fasilələrlə olsa da, verilirdi. Ağdamda hər saat evlər güllə atəşinə tutulurdu. Yollarda maşın hərəkət edə bilmirdi. Dərhal partladılırdı. Amm ağdamlılar bərk dayanmağa çalışırdılar. Hətta 1993-cü ilin aprelində Kəlbəcərin işğalı belə, ağdamlıları qorxutmamışdı. Sadəcə, Ağdamda yerləşən silah-sursatın, hərbi texnikanın çıxarılması vəziyyəti daha da gərginləşdirdi.
İyunun 6-da hərbi hissədəki qoşun üzvlərinə dedim ki, Murova hücum etməyə yox, müdafiəyə hazır olmalıyıq. Biz Gəncəyə hücum etməyəcəyik. Bizi siyasi oyunlara qatmasınlar. Sadəcə, Ağdamı müdafiə edək. Çünki rayonda vəziyyət gərgin idi. Dövr qarışıq dövr idi. Ermənilər Azərbaycanda təşkil olunan qiyamdan çox yaxşı istifadə etdilər. Artıq iyulun 22-23-də Ağdam ermənilərlə dolu idi. Həmin vaxt beşmərtəbə adlı yer vardı. Biz ordan baxırdıq. Çölə çıxa bilmirdik”.

www.modern.az

 

22.07.2017. Qərb qonşumuz üzərindən Azərbaycana şimal təhlükəsi; Moskva NATO-ya can atan Gürcüstanı ram eləmək üçün Cavaxetiya ermənilərini ayağa qaldıra bilər; son bir ildə əlaqələri xeyli istiləşən Türkiyə Rusiyadan əsən “soyuq küləyi” önləyə biləcəkmi? Ekspertlər deyir ki...


Azərbaycanın da daxil olduğu Güney Qafqaz ətrafında situasiya gərginləşməyə üz tutub. Sözsüz ki, bunun da qayəsində bölgənin həll olunmamış üç konflikti durur - Dağlıq Qarabağ, Abxaziya və Cənubi Osetiya. Ələlxüsus da Qarabağ ixtilafı bölgəni böyük inkişafdan və inteqrasiya proseslərindən saxlayan əsas əngəl olaraq qalır.

Moskva hələ ki Dağlıq Qarabağ məsələsinə müstəqilliyini birtərəfli qaydada tanıdığı Abxaziya və Cənubi Osetiyadan bir qədər fərqli yanaşır. Hərgah, mahiyyət ciddi şəkildə fərqlənmir. Kreml Qarabağ məsələsi ilə də Ermənistanın vasitəsi ilə eyni dərəcədə manipulyasiya edir, onun həllinə və region ölkələrinin bir-biri ilə dolğun əlaqələr qurmasına əngəl yarada bilir. Görəsən, nə vaxtadək? Gürcüstanın Qərbə, NATO-ya istiqamətli addımlarının intensivləşməsi Rusiyanı hansı məkrli ssenarilərə sövq edə bilər?


***

Image result for kreml


“Rusiya istəmədiyi müddət ərzində Cənubi Qafqazda konfliktlər bitməyəcək”. Bu sözləri axar.az-a Rusiyanın MDB ölkələrinə, o sırada Güney Qafqaz ölkələrinə təsirini yenidən gücləndirməyə çalışmasını şərh edən politoloq İlqar Vəlizadə deyib. Onun fikrincə, Moskva müxtəlif vasitələrlə Qafqaz dövlətlərini öz təsir dairəsindən kənara buraxmamağa çalışır.


“Cənubi Qafqazda 3 regional konflikt ocağı var. Praktika göstərir ki, xarici müdaxilələr hər zaman münaqişələrin gərginləşməsinə gətirib çıxarır. Rusiya bu konfliktlərə maraq göstərdiyi müddətdə münaqişə ocaqları həll olunmamış qalacaq”, - deyə o qeyd edib. Politoloqun sözlərinə görə, Kreml Qarabağdan fərqli olaraq, Abxaziya və Cənubi Osetiya konfliktində birbaşa iştirak edir.


“Rusiyanın rəsmi dövlət kimi Abxaziya və Cənubi Osetiyanı tanıması buna misaldır. Gürcüstanın bu regionları yenidən özünə inteqrasiya etdirməklə bağlı hər hansı bir ciddi addımı Rusiyanın müqaviməti ilə qarşılaşacaq. Moskvanın Tiflisə təzyiq üçün alternativ konflikt ocaqları yaratmaq ehtimalı da var. Bunlar sırasında daha təhlükəli vəziyyət erməni icmasının yaşadığı Cavaxetiya bölgəsi ilə bağlıdır. Moskva burada erməni diasporundan da istifadə edə bilər. Çünki buradakı erməni diasporu Rusiyada fəaliyyət göstərən erməni diasporu ilə sıx bağlıdır. Bu bağlılığa görə Rusiya istədiyi vaxt Cavaxetiya bölgəsində erməniləri bir təzyiq aləti kimi Tiflisə qarşı istifadə edə bilər” - politoloq vurğulayıb.

Image result for Tbilisi


***


Öz növbəsində keçmiş dövlət müşaviri Qabil Hüseynli Rusiyanın nə Cənubi Qafqazı, nə də Ukraynanı əlindən buraxmaq fikrində olmadığını deyir. O, Rusiyanın Cənubi Qafqazda olan 3 regional konflikt ocağını, o cümlədən Ukraynadakı konflikt ocaqlarını istədiyi zaman aktivləşdirə biləcəyi qənaətindədir: “Rusiya bu proseslərdə tənzimləyici rol oynayaraq, istədiyi vaxt Azərbaycan-Ermənistan sərhədində vəziyyəti gərginləşdirə bilər. Aprel əməliyyatları elə bunun nəticəsi idi. Ermənistan bir qayda olaraq, Rusiyanın təlimatı ilə hər an hərəkətə keçə bilər”.


Politoloq əmindir ki, Rusiya postsovet məkanına təsirini gücləndirmək istəyir: “Moskva Ukraynanın daxilində daha təhlükəli konfliktin bünövrəsini qoyub. Söhbət qondarma Malorusiya dövlətinin yaradılması və daha sonra Rusiyaya birləşdirilməsi planından gedir. İndi görünür ki, Rusiya SSRİ-nin keçmiş ərazilərində qurulmuş respublikaların ərazilərini zəbt etmək üçün ciddi proseslərə hazırlaşır. Rusiya öz məqsədini mərhələli şəkildə həyata keçirir”.

Image result for Qabil Hüseynli


Q.Hüseynli Moskvanın daha ağır zərbəni Gürcüstan üçün hazırladığını bildirib: “Rusiya Gürcüstana təsir göstərmək üçün Cavaxetiya bölgəsindəki erməniləri də ayağa qaldıra bilər. Cavaxetiya bölgəsində olan ermənilərin muxtariyyət tələb etmək istəyi tək İrəvandan deyil, həm də Rusiyadan gələn siqnallar əsasında həyata keçirilir. Gürcüstanın ağır günlərində Cavaxetiya erməniləri də ayağa qalxıb muxtariyyət tələb etməklə Tiflisin vəziyyətini daha da ağırlaşdırırdılar. Daha sonra Bakı-Tiflis-Ceyhan neft kəməri çəkiləndə də guya ekoloji maraqları nəzərdə tutaraq, bunun əleyhinə çıxırdılar. Bakı-Tiflis-Qars dəmir yolu tikilərkən də onlar fəal surətdə bunun əleyhinə kampaniya başlatdılar. Bu gün də Cavaxetiya erməniləri Gürcüstanda müəyyən üstünlüklərə malikdirlər. Onların sayı Gürcüstanda 150 minə çatmır, amma maraqlı məqam odur ki, orada olan 600 min azərbaycanlının parlamentdə cəmi 3, ermənilərin isə 6 nümayəndəsi var. Göründüyü kimi, Cavaxetiya erməniləri kifayət qədər fəaldırlar. Ermənilər həmişə Cavaxetiya ermənilərini Gürcüstandan ayıraraq, Qara dənizə çıxış uğrunda mübarizə aparıblar”.


***


Qeyd edək ki, Rusiya son zamanlar Gürcüstanda prezident seçkiləri ərəfəsi rusiyayönlü siyasətçilərin maliyyələşdirilməsini artırıb. Moskva həmçinin Abxaziya və Cənubi Osetiyada aktivləşməkdədir. Gürcü ekspertlərin fikrincə, Kreml bununla Tiflisin Qərbə, NATO-ya inteqrasiyasının qarşısını almağa çalışır.


Bundan başqa, Moskva Gürcüstanla bərabər Malorusiya adlı qondarma dövlət yaratmaqla Ukraynaya təzyiqlərini gücləndirib. Ukraynanı daim öz ərazisi hesab edən Kreml bu dövlət uğrunda savaşını gücləndirməklə SSRİ-dən sonra Qərblə arasında mövcud olan bufer zonasının yoxa çıxmamasına çalışır...

Image result for NATO


***


Bu arada İstanbuldakı Tədqiqatlar Mərkəzi bir ictimai sorğunun nəticələrini açıqlayıb. Musavat.com-un verdiyi məlumata görə, məlum olub ki, hazırda qardaş ölkədə Rusiyanı yox, ABŞ-ı ən qeyri-dost dövlət hesab edirlər (müvafiq surətdə 18 və 37% ). Avropa Birliyi ölkələrinin adları da qeyri-dost dövlətlər sırasında çəkilib (24%). Respondentlərin 71%-i isə Azərbaycanı Türkiyənin ən sadiq dostu hesab etdiyini deyib. Bu, ötən illə müqayisədə 12% çoxdur. Rusiyanı qatı düşmən ölkə sayanlar isə ötən illə müqayisədə (34%) azalaraq, 18%-ə düşüb.


Sorğudan göründüyü kimi, Ankara-Moskva münasibətləri keçən bir ildə xeyli istiləşib. Demək, məntiqlə Türkiyənin Rusiyaya təsir imkanları da artıb. Bəs imkanlar Dağlıq Qarabağ məsələsində özünü müsbət planda göstərə bilərmi?

Image result for Ankara-Moskva


Qeyd edək ki, prezident Rəcəb Tayyib Ərdoğan başda olmaqla, Türkiyənin yüksək çinli rəsmiləri dəfələrlə, həm də Rusiyaya səfərlər çərçivəsində bəyan ediblər ki, Dağlıq Qarabağ konfliktinin həlli üçün ilk növbədə Azərbaycanın işğal altındakı rayonlarından heç olmasa, bir neçəsinin azad edilməsi qaçılmazdır və bundan sonra bölgədə böyük iqtisadi sıçrayış başlaya bilər. Rayonların azad edilməsi isə bilavasitə Rusiyadan və onun iradəsindən, daha doğrusu, Kremlin öz vassalı Ermənistana təsirindən asılıdır.


Əgər Moskva bunun əvəzində, üstəlik, Gürcüstanda - Türkiyə və Azərbaycanın mühüm strateji tərəfdaşı olan ölkədə “üçüncü Qarabağ”ı yaradacaqsa, o zaman dolayısıyla, Türkiyə və Azərbaycanın maraqlarına da ziyan vurmuş olacaq. Demək, enində-sonunda öz maraqları da ziyan görəcək. Çünki Gürcüstan bölgədə tək deyil.

www.musavat.com

 

21.07.2017. Təməli 2007-ci idə qoyulan Bakı-Tbilisi-Qars dəmir yolu xəttinin tikintisinin nəhayət bu ilin sonunda tamamlanacağı açıqlanıb.

Virtualaz.org xəbər verir ki, bu günlərdə Türkiyənin Qars şəhərində layihənin əhatə etdiyi ölkələrin nəqliyyat və dəmir yol rəsmilərinin iştirakı ilə keçirilən toplantıda deyilib ki, Tbilisi-Qars dəmir yolunun Türkiyə tərəfində 68 kilometrlik, Gürcüstan tərəfində isə 30 kilometrlik hissəsinin tamamlanmasından sonra sentyabrda sınaq qatarlarının buraxılacağı açıqlanıb.

 

Həmin toplantını izləyən jurnalistlərdən biri, “Habertürk” qəzetinin yazarı Serpil Yılmaz bildirir ki, həmin 98 kilometrlik yolun tikintisi üçün düz 10 il vaxt lazım gəldiyi inandırıcı görünmür.Axı necə ola bilər ki, həmin müddətdə bir sıra meqa infrastruktur layihələri həyata keçirən Türkiyə ildə cəmi 10 kilometr rels döşəsin?

“Azərbaycan Dövlət Dəmir Yollarının rəhbəri Cavid Qurbanov toplantı zamanı söhbətimizdə “ermənilər əngəllədilər” dedi. Onun bu tezisinin layihənin ləng həyata keçirilməsində payı ola bilər. Axı Bakı-Tbilisi-Qars dəmir yolu tamamlanandan sonra Türkiyənin SSRİ dövründən qalan Ermənistan dəmir yollarına ehtiyacı qalmır”-müəllif yazır.

 Xatırladaq ki, Bakı-Tbilisi-Qars dəmir yolunun tikintisinin tamamlanması illərdir ləngiyirdi. Bu, gah Türkiyə tərəfində “havaların sərt keçməsi”, gah podratçı şirkətlərin işləri yarıtmaz həyata keçirməsi, Gürcüstan tərəfdə isə yolun keçdiyi ərazilərdə relyefin sərt olması kimi müxtəlif səbəblərlə əsaslandırılırdı. Azərbaycan bu layihə üçün Gürcüstana yüz milyonlarla dollar güzəştli kredit ayırıb, strateji əhəmiyyət daşıyan nəqliyyat dəhlizinin mümkün qədər tez işə düşməsi həm siyasi, həm iqtisadi baxımdan olduqca mühümdür. Bu günlərdə Türkiyə mənbələri bildirmişdi ki, layihəni əngəlləmək istəyən “çox nüfuzlu dairələr” var. İndi Cavid Qurbanov ermənilərin əngəli barədə danışır. Burada söhbət birbaşa təsirdən əlbətdə ki, gedə bilməz. Lakin Rusiya və ABŞ-dakı erməni lobbi çevrələrinin həmin ölkələr vasitəsilə layihəyə əngəllər yaratması səyləri, bu haqda çox vaxt açıq danışılmasa da, mövcud idi.

www.Virtualaz.org

 

22.07.2017. Azərbaycan prezidenti İlham Əliyev və Rusiya prezidenti Vladimir Putin arasında Soçidə keçirilən görüşdə Ermənistan-Azərbaycan, Dağlıq Qarabağ münaqişəsinin həlli ilə bağlı məsələlər müzakirə edilib.

APA-nın məlumatına görə, bundan başqa, dövlət başçıları Azərbaycanla Rusiya arasında strateji tərəfdaşlıq əlaqələrinin mövcudluğunu bir daha təsdiqləyib, ikitərəfli münasibətlərin siyasi, iqtisadi, humanitar və digər sahələrdə uğurla inkişaf etdiyini vurğulayıblar.

Beynəlxalq və regional problematika ətrafında da fikir mübadiləsi aparılıb.

Hər iki dövlət başçısı Rusiya-Azərbaycan dostluq və strateji tərəfdaşlıq əlaqələrinin bundan sonra da uğurla inkişaf edəcəyinə əminliklərini bildiriblər.

Azərbaycan prezidentinin Rusiyaya işgüzar səfəri iyulun 22-də başa çatıb.

www.apa.az

 

22.07.2017. Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 132 dəfə pozub.

Bu barədə  Azərbaycan Müdafiə Nazirliyinin mətbuat xidmətindən məlumat verilib.

Ermənistan Respublikası İcevan rayonunun Berkaber kəndində və adsız yüksəkliklərdə yerləşən mövqelərdən Qazax rayonunun Məzəm, Qızılhacılı kəndlərində və adsız yüksəkliklərdə, Berd rayonunun Çinari və Ayqedzor kəndlərində yerləşən mövqelərdən Tovuz rayonunun Koxanəbi, Muncuqlu kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən Azərbaycan ordusunun mövqeləri atəşə tutulub.

Tərtər rayonunun işğal altında olan Yarımca, Ağdam rayonunun Baş Qərvənd, Şirvanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qorqan, Kürdlər, Horadiz, Cəbrayıl rayonunun Nüzgar kəndləri yaxınlığında, həmçinin Göygöl, Goranboy, Tərtər, Ağdam və Xocavənd rayonları ərazisindəki adsız yüksəkliklərdə yerləşən mövqelərdən də Azərbaycan Silahlı Qüvvələrinin mövqeləri atəşə tutulub.

www.musavat.com

 

sefir quds meselesinin hellini tapmamasi beynelxalq siyasetde ikili standartlarin movcud oldugunu gosterir
 21.07.2017. “Qüds məsələsinin uzun müddət həllini tapmaması beynəlxalq siyasətdə ikili standartların mövcud olduğunu göstərir”.

 

APA-nın məlumatına görə, bunu xüsusi tapşırıqlar üzrə səfir Şahin Abdullayev deyib. Səfir bildirib ki, BMT-nin qətnamələrinin bəziləri dərhal həllin tapır, bəziləri isə illərlə kağız üzərində qalır.

 

“Azərbaycan da həmin vəziyyətdədir. Təhlükəsizlik Şurasında 1993-cü ildə Dağlıq Qarabağda işğala son qoyulmasına dair qətnamələr qəbul edilib. Amma indiyədək icrası mümkün olmayıb. Buna səbəb qətnamələrin icra mexanizmin olmamasıdır. Digər səbəb isə bəzi ölkələrin aktual məsələlərə passiv münasibət, işğalçıya təzyiq göstərməməsidir. İkili standartlar göz qabağındadır" – deyə, o bildirib.

 

Ş. Abdullayev deyib ki, Bakıda keçirilən beynəlxalq konfransın ərəb-müsəlman dünyasının müqəddəs şəhəri sayılan Qüds şəhərinin məsələsinin həllini gətirib çıxaracağını ümid edir.

www.apa.az

 
 

21.07.2017. Bu gün Qarabağ hələlik məğlub kimi görünən Azərbaycanın ən ağrılı problemidir. Amma qalib kimi görünən, Qarabağ savaşında müvəqqəti qələbə qazanmış Ermənistan da 25 ildir ki, bu münaqişənin doğurduğu problemlərdən ciddi əziyyət çəkir.

 

 Belə ki, faktiki olaraq, Ermənistan işğalçılıq siyasətinə görə Cənubi Qafqz regionunun autsayderinə çevrilib. Qonşuları Azərbaycan və Türkiyə ilə sərhədləri bağlı olan Ermənistan bu gün özünü iqtisadi, nəqliyyat və siyasi təcrid durumuna gətirib. Sovet İttifaqı dövründə ən yüksək həyat səviyyəsi olan respublikalardan sayılan Ermənistan bu gün bütün göstəriciləri ilə orta əsrlər dövrünə qədər geriləyib. Bu ölkədə işsizlik rəsmi rəqəmlərə görə 34,5%-ə çatır, 1989-vu ildə burda 4,2 milyon insanın yaşayırdısa, bu gün həmin rəqəm 2,9 milyona qədər azalıb. Robert Koçaryan və Serj Sarkisyanın başçılığı altındakı hərbi xunta Yerevanda hakimiyyəti ələ alaraq yerli ermənilər üçün dözülməz yaşayış Ermənistanı yaşayış üçün dözülməz ölkəyə çeviriblər.

 

İqtisadiyyatın ayrı-ayrı sahələrinin kiçik bir qrup məmur-oliqarxlara verilməsi, ədalətli məhkəmə sisteminin olmaması, işsizlik, maaşların azlığı, Qarabağda yeni müharibə qorxusu düşmən ölkədə intihar və mühacirəti artırıb. Aprel döyüşlərindən sonra erməni cəmiyyəti Dağlıq Qarabağ müharibəsinin ciddi təhlükə törətdiyini tam şəkildə anladı. 4 gün ərzində 106 nəfər itki verən (Ermənistan düzgün rəqəmləri heç vaxt açıqlamır –V.İ) Ermənistan 90-cı illərdə qazandıqları təsadüfi uğurlarının davamlı olmayacağını, hərbi-siyasi şərtlərin tamamilə dəyişdiyini anladı. Ümumiyyətlə, 80-ci illərin sonlarında Qarabağda separatçı hərəkat baş qaldıran zamandan bəri erməni cəmiyyətinin münaqişənin həlli ilə bağlı mövqeyinin çox sərt olduğu açıq-aşkar görünür.

 

Münaqişənin həllini radikal və güzəştsiz münaqişədə görən ermənilər 1994-cü ildən bəri mövqelərini daha da sərtləşdirmişdilər. Belə ki, Bişkek protokolundan sonra aparılan danışıqlarda ilk növbədə 7 ətraf rayonun qeyri-şərtsiz azad olunması və Dağlıq Qarabağa ən yüksək muxtariyyətin verilməsi nəzərdə tutulurdusa, növbəti illərdəki danışıqlar zamanı Ermənistan tərəfi Laçın və Kəlbəcərin statusu ilə bağlı qeyri-müəyyən açıqlamalar verməyə, Dağlıq Qarabağda müstəqillik referendumu təklifi ilə çıxış etməyə başlamışdılar. Halbuki, Ermənistanın hazırki prezidenti Serj Sarkisyan Ağdamın heç zaman erməni ərazisi olmadığını və Cəbrayıl, Qubadlı, Zəngilan, Füzuli, Ağdam və Kəlbəcər rayonlarının təhlükəsizlik zonası kimi onlara lazım olduğunu dəfələrlə elan etmişdi. Bu açıqlama düşmən ölkənin radikal dairələri tərəfindən sərt qarşılanmışdı. Aprel döyüşləri və onun ardınca “Sasna Tser” qruplaşmasının polis alayının binasına hücumu Yerevanda kompromisə qarşı olan qüvvələrin çoxluq təşkil etdiyini göstərir. Son parlament seçkilərində siyasi partiyalardan heç birinin proqramında Dağlıq Qarabağla bağlı güzəşt proqramının olmaması da erməni cəmiyyətinin güzəştlərə hazır olmadığını göstərdi.

 

Təmas xəttində verilən çoxsaylı itkilər, bağlı sərhədlər, kütləvi mühacirət və s. erməni xalqını psixologiyasına dərindən yeridilmiş dənizdən dənizə Böyük Ermənistan xülyasından ayılda və hadisələrə soyuqqanlı gözlə baxmağa imkan vermir. Görünür ki, xülyadan ayılaraq acı reallığa baxmaq üçün Ermənistana daha miqyaslı və sərt aprel silkələnməsi lazımdır...

www.modern.az

 
 

21.07.2017. Cəbrayıl rayonunun işğaldan azad edilmiş Cocuq Mərcanlı kəndi telekommunikasiya xidmətləri ilə təmin olunub.
 
Moderator.az AzərTac-a istinadən xəbər verir ki, Nəqliyyat, Rabitə və Yüksək Texnologiyalar Nazirliyinin “Aztelekom” Məhdud Məsuliyyətli Cəmiyyətinin nümayəndələri Cocuq Mərcanlıda Şahəddin Hüseynovun evində olub, ailəyə telefon aparatı, modem, noutbuk hədiyyə ediblər. Ailə telefon və internet abunə haqqından azad edilib.
 
Məlumat verilib ki, “Aztelekom” Məhdud Məsuliyyətli Cəmiyyəti tərəfindən kəndə 10 kilometr məsafədən optik kabel çəkilib, 64 nömrə tutumlu elektron Avtomat Telefon Stansiyası (ATS), kənd daxilində telefon kabellərin yeraltı çəkilişi üçün kabel-kanalizasiya qurğuları quraşdırılıb, 1200 metrədək məsafədə daxili şəbəkə qurulub. Cocuq Mərcanlıda inşa edilən 50 yeni evin hamısı, həmçinin məktəb telefonlaşdırılıb, internetlə təmin edilib.
 
“Aztelekom” Məhdud Məsuliyyətli Cəmiyyətinin baş direktoru Suat Paşayev jurnalistlərə müsahibəsində bildirib ki, Prezident İlham Əliyevin Sərəncamına uyğun olaraq yenidən qurulan Cocuq Mərcanlıda əhalinin dayanıqlı və fasiləsiz rabitə xidməti ilə təmin olunması işləri yekunlaşıb. Burada ən son texnologiyalardan istifadə olunub. Hələlik 50 ailə üçün nəzərdə tutulmuş ATS-in tutumu gələcəkdə tikiləcək evlərin sayına uyğun olaraq artırılacaq.
 
 

 

21.07.2017. Xəbər verildiyi kimi bu gün axşam Azərbaycan prezidenti İlham Əliyev Soçidə Rusiya prezidenti Vladimir Putinlə işgüzar görüş keçirəcək. Görüş barədə az əvvəl Putinin mətbuat katibi Dmitri Peskov anons edib, müzakirə olunacaq məsələlərlə bağlı heç nə deyilməyib.

Bununla belə Azərbaycan və Rusiya prezidentlərinin xeyli fasilədən sonra keçiriləcək bu görüşü müzakirəsi gözlənilən məsələlər baxımından olduqca mühümdür, hətta kritik hesab edilə bilər. Belə ki, Rusiya prezidenti ilə müzakirə etmək üçün heç şübhəsiz Qarabağ başda olmaqla Bakını narahat edən bir sıra ciddi məsələlər var.

Qeyd etmək lazımdır ki, Azərbaycan-Rusiya strateji tərəfdaşlıq münasibətləri son illərdə doğrudan da ciddi ölçülərdə irəliləyib. Və bunda əsas rolu prezidentlərin möhkəm şəxsi münasibətləri oynayıb. Bununla belə son vaxtlar Rusiya ilə münasibətlərə dair Bakını narahat edən məqamlar da ortaya çıxıb.

 Bunlardan biri Kremlin Dağlıq Qarabağ münaqişəsinin nizamlanmasına dair çoxdan dayanmış danışıqlar prosesini, hansı ki, söhbət münaqişənin həlli yollarının müzakirə olunduğu konkret, mahiyyət üzrə danışıqlardan gedir, bərpa etmək üçün səylərini zəiflədib. Yaxud belə demək olar ki, Rusiya ötən ilin aprelində hərbi əməliyyatları dayandırandan sonra Kremlin nəhayət erməni tərəfini danışıqlar masası arxasına keçməyə məcbur edəcəyinə dair Bakıda yaranmış ümidlər özünü doğrultmayıb. Əvəzində Rusiya Ermənistanla hərbi müttəfiqlik münasibətlərini daha da möhkəmləndirərək İrəvana sanki status-kvonu uzatmaq üçün yeni kart-blanş verib.

Nəticədə Ermənistan danışıqlardan nümayişkarənə şəkildə yayınır və bunu hər dəfə münaqişənin həllinə birbaşa dəxli olmayan hansısa “yerinə yetirilməmiş öhdəliklərlə” əsaslandırır. Bu günlərdə Rusiya XİN-dəki mənbəyə istinadən belə xəbər yayılmışdı ki, Moskva payızda Azərbaycan və Ermənistan prezidentlərinin görüşünün təşkili üzərində işləyir, yaxud tərəflərə belə təklif təqdim edib. Ancaq həmin məlumatı Rusiya XİN-in rəsmisi Artyom Kojin “uydurma” adlandırıb, Moskvanın tərəflərə belə təklif vermədiyini bildirib.

 

Minsk Qrupunun digər iki həmsədri ABŞ-la Fransa hazırda Qarabağla məşğul olmaq həvəsində deyil. Donald Tramp özünü Rusiya məsələsinə görə getdikcə artan təzyiqlərdən müdafiə etməklə məşğuldur və Qafqazın problemləri ilə maraqlanmağa vaxtı yoxdur.Hərçənd Bakının bu məsələdə ABŞ-ın yeni administrasiyasından böyük gözləntiləri var. Fransada isə yeni prezident Emmanuel Makron prezidentlərin görüşünə ev sahibliyi etməyə hazırdır, ancaq Qarabağ məsələsi ilə yaxından məşğul olmaq üçün təcrübəyə malik deyil. Makronun gündəmində hələlik geosiyasət yoxdur və onun başı ölkəsinin daxili təhlükəsizlik məsələlərinə, bir də Avropa İttifaqının problemlərinə qarışıb.

Nəticədə Rusiya faktiki olaraq Qarabağ münaqişəsində aparıcı rola malik olan tək həmsədrdir. Deməli danışıqların bərpası üçün əsas ümidlər də Moskvayadır. Moskvanın isə fəal səyləri nəzərə təəsüf ki, çarpmır, bu səylər son vaxtlar səngiib. Bu baxımdan gözləniləndir ki, Soçi görüşündə Rusiyanın Qarabağa dair səylərinin artırılması məsələsi qaldırılacaq.

 

Qarabağ məsələsi konktekstində Azərbaycanı narahat edən məsələlərdən biri də Rusiyada erməni diaspor çevrələrinin hakimiyyət və ictimai institutlardakı adamları vasitəsilə son vaxtlar Moskvanın Azərbaycana dair (o cümlədən Qarabağ məsələsində) siyasətinə təsir etmək səylərini artırmasıdır. Bakıdan belə səyləri aydın müşahidə etmək olur və erməni lobbi dairələri Rusiya-Azərbaycan strateji tərəfdaşlıq münasibətlərini zəiflədə bilmək üçün bütün imkanlardan istifadə etməyə çalışırlar.

Rusiya XİN-in “erməni əsilli Rusiya vətəndaşlarının Azərbaycana buraxılmaması və diskriminasiyası” barədə bu günlərdə səslənən, Bakıda böyük təəcüblə qarşılanan və diplomatik üslubdan uzaq, hətta kobud ifadələrin yer aldığı bəyanatlar Azərbaycan hakimiyyət dairələrində haqlı olaraq suallar doğurdu. Rəsmi Bakı, o cümlədən prezidentin xarici əlaqələr üzrə köməkçisi bu bəyanatların təəcüb və təəsüflə qarşılandığını ifadə etdi. Hansı ki, bundan əvvəl Rusiyadakı əsas azərbaycanlı diaspor təşkilatının qeydiyyatının məhkəmə yolu ilə ləğv edilməsi də Bakıda təəcüb və təəsüf hissi ilə qarşılanmışdı.

 

Hazırda təşkilatın qeydiyyatının ləğvi barədə qərardan apelyasiya şikayəti məhkəmə baxışındadır və Bakı ümid edir ki, Rusiya-Azərbaycan münasibətlərində müəyyən məyusluq yaradan bu məsələ yuxarı instansiyada müsbət həll olunacaq. Gözlənilir ki, prezidentlərin Soçi görüşündə bu məsələ də qaldırılacaq.

Daha geniş kontekstdə isə prezidentlərin strateji tərəfdaşlıq münasibətlərini daha da dərinləşdirmək yolları üzərində fikir mübadiləsi aparacağı təxmin edilə bilər. Hansı ki, Azərbaycan Rusiya ilə strateji tərəfdaşlıq münasibətlərinə tam sadiq qalıb və münasibətlərin bu səviyyəsinin tələb etdiyi kimi öz qonşusu, mühüm tərəfdaşı ilə ortaq maraqlar çərçivəsində hərəkət edib, yaxud Rusiyanın maraqlarına zidd hansısa addımlar atmayıb və indi qarşı tərəfdən də bu münasibət gözləməkdə haqlıdır.

 

Ermənistan barəsində isə bunları demək olmaz, çünki son vaxtlar İrəvanın siyasətində strateji müttəfiqinin maraqlarına birbaşa zidd olan bir sıra çalarlar meydana çıxıb. Məsələn, Rusiyanın İrandakı səfiri olan erməni Caqaryanın prezident Putinin şəxsən dəstəklədiyi “Şimal-Cənub” nəqliyyat dəhlizinə qarşı iş apardığı haqda virtualaz.org yazmışdı. Yaxud İrəvan Avropa İttifaqı ilə yeni üstün tərəfdaşlıq razılaşmasını paraflayıb və payızda imzalamağa hazırlaşır. Hansı ki, bu razılaşma Rusiyanın öz maraqlarına birbaşa təhlükə hesab etdiyi Assosiasiya razılaşmasına çox yaxındır.

Eləcə də Ermənistanın NATO ilə tərəfdaşlığında xeyli fəallıq müşahidə edilir və bütün bunlar Moskvanın alyansı öz sərhədlərindən mümkün qədər uzaq tutmaq üçün çalışdığı bir vaxtda baş verir. Başqa sözlə, Ermənistanın Rusiyanın maraqlarına hər fürsətdə xəyanət etdiyi bir vaxtda Azərbaycan Moskvanın siyasətində erməni maraqlarına doğru aşkar meyllənmə əlamətlərini niyə təəsüf və təəcüblə qarşılamasın ki?!

www.virtualaz.org

QARABAĞ QALERIYA

QAT.az