Bazar ertəsi, 20 Noyabr 2017
 
 
 

20.11.2017. Ermənistan Milli Təhlükəsizlik Xidmətinin Sərhəd Qoşunlarının hərbçisi bıçaqlanıb.

“Report” Ermənistan KİV-inə istinadən xəbər verir ki, bu haqda ölkənin İstintaq Komitəsinin mətbuat xidməti məlumat yayıb.

Hadisə Baqrataşen Nəzarət-Buraxılış Məntəqəsində baş verib. Həmin hərbçi “Mersedes-Benz” markalı avtomobili yoxlamaq məqsədi ilə saxlayıb. Bu zaman sürcü ilə hərbçi arasında mübahisə düşüb. Onların mübahisəsinə əlində bıçaq olan daha bir mülki şəxs qoşulub. O, hərbçini bıçaqlayaraq, yaralayıb.

Həmin şəxs barəsində Cinayət Məcəlləsinin hakimiyyət nümayndəsinə vəzifəsinin icrası zamanı müqavimət göstərmək maddəsi ilə cinayət işi başlanılıb. Hadisə iştirakçılarından biri saxlanılıb. Qalanların axtarış üzrə əməliyyat tədbriri keçirilir.

Məlumata görə, baxış zamanı avtomobildə qaçaq mal aşkarlanmayıb.

Qeyd edək ki, “Baqrataşen” Nəzarət-Buraxılış Məntəqəsi Ermənistanın Tauş rayonu ərazsində və Ermənistan-Gürcüstan sərhədində yerləşir.

www.report.az

20.11.2017.  Zahid Oruc: “Rusiya məxfi xidmət orqanları xarici işlər nazirinin dilindən Moskvanın yeganə çözüm qarantı olduğunu bizlərə xatırladır”


“Lavrovun Bakı və İrəvana səfəri sözügedən ölkələrlə münasibətlərin keçmişinə dair hesabat vermək, yaxud Moskvanın gələcək regional strategiyasını təqdim etməkdən daha çox qarşıdakı Brüssel sammiti ilə bağlı Kremlin əsas postulatlarını bölgə dövlətlərinə çatdırmaq məqsədi güdür”.

Deputat, Milli Məclisin Təhlükəsizlik, müdafiə və korrupsiyaya qarşı mübarizə komitəsinin üzvü Zahid Oruc Musavat.com-a Rusiya XİN rəhbəri Sergey Lavrovun Azərbaycan və Ermənistana səfərini şərh edərkən bunları bildirib. Rus diplomatın səfəri ətrafında səslənən şərhlərə, Kremlin Qarabağ məsələsini, yoxsa digər məsələni prioritet sayması ilə bağlı fikirlərə gəldikdə, deputat bunları deyib: “Doğrudur, informasiya məkanına verilən mesajlar daha çox Qarabağ münaqişəsi ətrafında son vəziyyətə yönəlib və görünür, Rusiya məxfi xidmət orqanları Cənubi Qafqazdakı ictimai-siyasi atmosferin hansı platforma üzərindən tez fəth olduğunu yaxşı bildiklərindən yenə də xarici işlər nazirinin dilindən Moskvanın yeganə çözüm qarantı olduğunu bizlərə xatırladır. Hələ üstəlik, belə qorxu mövcuddur ki, Qərblə yaxından inteqrasiya dövlətlərarası konfliktlərin həllini də əhatə edər və regionda fərqli geopolitik düzənə yol açar. Daha dərindən yanaşanda, belə ehtimallar qətiyyən əsassız deyil. Çünki 24 noyabrdan sonra Ermənistan və Azərbaycan rəhbərləri Avropa paytaxtları ilə imzalanmış öhdəliklər və “yol xəritəsi” fonunda təmaslarını getdikcə daha da artıracaq və nəticədə, Moskvanın tərəflərə təsir rıçaqları qat-qat zəifləyə bilər. Bir gün Quzey Kıprıs problemində olduğu kimi, Avropa Birliyi tərəfindən Qarabağ probleminin həlli üçün Rusiyadan daha cazibədar təkliflərinə şahid olar və bölgədə təhlükəsizlik təşəbbüslərini əldən verə bilər. Onda necə olsun? Pis-yaxşı köhnə dünya düzəninə əsaslanıb Amerika və Rusiyanın birgə səyləri ilə Qafqazda münaqişələrin qarşısı alınır və Lavrovun Diplomatik Akademiyada suallara cavab verərkən “bizim Ağ Evlə münasibətlərimizin pisləşməsi Qarabağ məsələsinə təsir etməyib” sözləri də dediklərimizi sübut edir”.

Z.Oruc qeyd etdi ki, Moskva Cənubi Qafqazda yeni geopolitik inqilab və ya toqquşma gözləmir: “Ona ikinci Ukrayna cəbhəsi açaraq, Avropa Birliyinə üzünü çevirməyə hazırlaşan keçmiş müttəfiqlərə təzyiq və hədələrlə yanaşı, mütləq birgə maraqlarını qoruya biləcək təşəbbüslər də gərəkdir. Resurs baxımından Qərb nə qədər güclü olsa da, Rusiyanın keçmiş sovet respublikaları üzərindəki təsir gücünü sındırmağa və cızdığı “qırmızı xətti” keçməyə gücü çatmır. Ona görə Lavrovun gətirdiyi təkliflər paketində təkcə diktat elementləri axtarmağına dəyməz. Çünki getdikcə daha çox sanksiyalara məruz qalan bir ölkə yalnız sərt hərbi dillə tərəfdarlarını artıra bilməyəcək. Vaşinqtonun Moskvanı iqtisadi-siyasi cəhətdən təcrid etmək xətti bizim ölkələri çətin vəziyyətdə qoyur. Ona görə də Rusiyanın xarici siyasət idarəsinin rəhbəri qlobal toqquşmada qonşuların özünü necə aparacağını bilmək istəyir”.

İrəvan səfəri ilə bağlı gözləntilərə gəldikdə, Z.Orucun fikrincə, Ermənistanda görüşlər zamanı hər kəs əmin olacaq ki, Moskva regiona hansı siqnalları vermək istəyir: “Ərdoğanın Putinlə görüşündən çıxış edərək, deyə bilərik ki, Ermənistan və Azərbaycan arasındakı gələcək sülh Qərbdən asılı olmamalıdır. Sadə dillə desək, Putin Suriyadakı tərəfdaş 3 ölkə ilə elə Qarabağ məsələsini də həll etmək istəyərdi. ATƏT-də iş görmək qeyri mümkün olduğundan alternativ format artıq ortadadır. Nəticə effektli olsa, onu başqa konfliktlərə də tətbiq edəcəklər”.

www.musavat.com

 
 

20.11.2017. Azərbaycan ərazilərini işğal altında saxlayan Ermənistana qarşı dünya birliyi sərt reaksiya göstərməlidir.

Axar.az xəbər verir ki, bu sözləri Brüsseldə keçirilən “Separatizmin beynəlxalq sülhə və təhlükəsizliyə yaratdığı təhdidlər" adlı beynəlxalq forumun ikinci panelində çıxış edən Almaniyanın keçmiş deputatı və dövlət katibi, Azərbaycanın Almaniyadakı fəxri konsulu Otto Hauzer deyib. O bildirib ki, Rusiyaya qarşı olan iqtisadi və siyasi sanksiyalar Ermənistana da tətbiq edilməlidir.

“Terrorizm və separatizmin qarşısını sanksiyalarsız almaq mümkün deyil. Sanksiyalar olmalıdır ki, 20 ildən artıqdır evlərindən didərgin düşmüş insanlar öz yurd-yuvalarına qayıda bilsinlər”.

www.axar.az

 
 
 

20.11.2017. Moldovanın sabiq ombudsmanı Aurelia Qriqoriu Separatizmin beynəlxalq sülhə və təhlükəsizliyə yaratdığı təhdidlər" forumunda çıxış edib.

Aurelia Qriqoriu çıxışına başda Nazim İbrahimov olmaqla Azərbaycanın Diaspora ilə İş Üzrə Dövlət Komitəsinə təşəkkür edib.

Xanım Aureliia Qriqoriu hazırda davam edən forum olduqca önəmli bir tarixə - Şərq Tərəfdaşlıq Forumunun başlandığı ərəfəyə təsadüf etdiyini bildirib. Onun sözlərinə görə, burda deyilən fikirlərin həmin foruma təsir edəcəyi şübhəsizdir.

Xanım Qriqoiu həmçinin çıxışında bildirib ki, Dağlıq Qarabağ separatizm nümunəsi yox, işğaldır. Ermənilərin Dağlıq Qarabağı və ətrafındakı 7 rayonu işğal etməsinə diqqət çəkən çıxışçı 1 milyon azərbaycanlı qaçqın faktoruna da diqqət çəkdi: "Bu, dünyada görünməmiş qaçqın axınıdır. Təəssüf ki, dünya birliyi buna seyrçi qaldı. Ardınca isə digər işğal prosesləri ortaya çıxdı. Bunların sırasında Dnepryanı proseslər, Gürcüstandakı və Krımdakı hadisələri misal çəkmək olar".

Serj Sərkisyanı "cinayətkar" adlandıran xanım Qriqoriu daha sonra sərt bəyanatlar verib: "Bu dəstənin əlləri Azərbaycanın dinc əhalisinin qanına batıb. Buna baxmayaraq, dünyanın bir çox liderləri ona salam verir və qanlı əllərini sıxırlar. Amma bu kimi nümunələr aradan qalxmalıdır. Onlara bu cür münasibət yeni cinayətlərə təhrik etmək, hərbi cinayətlərin cəzasızlıq mühitinin yaradılmasıdır. Bu cür cinayətkarlar dünya liderləri tərəfindən qəbul olunmamalı, onlarla görüşülməməlidir".

A.Qriqoriu sonda təklif verib ki, Ermənistan və bölgələrdəki canilərə Avropa ölkələrinə viza verilməsi dayandırılsın, eləcə də işğal bölgələrinə səfərləri dayandırılsın.

www.musavat.com

 
 

 20.11.2017. Türk Hərəkatı Partiyasının baş katibi, millət vəkili Enes İbrahim Türk Hərəkat Partiyasında sədr postu uğrunda baş tutan konqres seçkilərində qələbə qazanaraq partiyanın sədri seçilib.

 
Bu barədə məlumatı diaspor üzrə araşdırmaçı-jurnalist,siyasətçinin dostu Elnur Eltürk verib.
 
“Onun sədri seçilməsi partiyada gənclərin önə çəkiləcəyindən xəbər verir. Enes İbrahim Balkanlarda populyar siyasətçidir. Azərbaycan məsələsini daima diqqət saxlayır. Onunla söhbətimizdə Makedoniya-Azərbaycan əlaqələrinin inkişafına çalışacağını,xüsusilə, partiya olaraq Qarabağ məsələsini diqqətlərində saxlayacaqlarını bildirdi. ”,-deyə Elnur Eltürk qeyd edib.
 
www.moderator.az
 
 

 20.11.2017. 2017-ci ilin noyabr ayının 14-17-də Moskva şəhərində, “Müstəqil Dövlətlərin Veteranlar (Pensiyaçılar) İctimai Təşkilatları Birliyi Beynəlxalq İtiffaqı”nın növbədənkənar VII Qurultayı və Təşkilatın Kordinasiya Şurasının plenumu keçirilib. Tədbirlərdə Azərbaycanı Respublika Veteranlar Təşkilatının sədr müavini, polkovnik Cəlil Xəlilov təmsil edib.

 
Tədbirlər çərçivəsində noyabrın 16-da “Müasir dövürdə 1941-1945-ci illər Böyük Vətən müharibəsi tarixini saxtalaşdıranlara qarşı mübarizənin gücləndirilməsi” mövzusunda elmi-praktik konfrans keçirilib. Konfransda Beynəlxalq İtiffaqın sədr müavini V.Tkaçenkonun “1941-1945-ci illər Böyük Vətən müharibəsi tarixinin saxtalaşdırılmasına qarşı mübarizədə veteran təşkilatlarının rolu” mövzusunda məruzəsi dinlənilib.
 
Respublika Veteranlar Təşkilatının sədr müavini, polkovnik Cəlil Xəlilov “Faşizim insanlığa yad ideologiyadır” mövzusunda məruzə ilə çıxış edib. C.Xəlilov çıxışında İkinci dünya müharibəsində faşizm üzərində böyük qələbənin əldə olunmasında Azərbaycanın yaxından iştirakın, bəşəriyyətin dəhşətli bəladan xilasında xalqların birgə nailiyyətinə verilən digər töhfələrindən, qanlı döyüşlərdə qəhrəmancasına vuruşan 350 min soydaşımızın həyətlarını itirməsindən danışmış, ölkəmizdə 9 may Qələbə gününün hər il böyük təntənə ilə qeyd edildiyini bildirmişdir.
 
C.Xəlilov tədbir iştirakçılarının diqqətini İkinci dünya müharibəsinin tarixinin, ümumən tarixin ermənilər tərəfindən məqsədli şəkildə saxtalaşdırılmasına, belə münasibətin yolverilməzliyinə yönəltmiş, Azərbaycanın bu məsələlərdə tutduğu qəti və obyektiv mövqeyi çatdırmışdır. O demişdir: “Azərbaycanın 20 faizdən çox ərazisini bugünədək işğal altında saxlayan Ermənistan tərəfi özünün təcavüzkarlıq siyasətini açıq və arxayın şəkildə davam etdirir. Ermənilər bu siyasəti öz faşist sələflərindən, alman faşizminə xidmət göstərmiş erməni cəlladları general Dro və Qaregin Njde kimi cəlladlardan əxz etmişlər. Neçə ildir ki, nəinki ayrı-ayrı şəxslər, hətta Ermənistanın dövlət rəhbərliyi səviyyəsində həmin faşist cəlladların bəraətinə çalışılır. Bununla bağlı artıq neçə ildir ki, biz Azərbaycan veteranları, ümumən cəmiyyəti həyacan təbili çalır, beynəlxalq ictimaiyyəti erməni faşızminin ifşasına biganə qalmamağa, dünən və bu gün onlar tərəfindən törədilən cinayətləri birmənalı şəkildə qınamağa çağırırıq. Bununla bağlı müraciət hazırlanaraq Azərbaycan veteranları adından MDB ölkələrinin dövlət və hökumət başçılarına, həmin ölkələrin parlament üzvlərinin elektron ünvanlarına, veteran təşkilatlarına, beynəlxalq təşkilatlara göndərilmişdir. Ancaq təəssüf ki, bir nəticə yoxdur, əks-halda Ermənistan dövləti təcavüzkarlıq siyasətinə son verər, Azərbaycan torpaqları işğaldan azad edərdi”.
 
Cəlil Xəlilov çıxışınında həmçinin, Azərbaycan Veteranlar Təşkilatının xüsusilə MDB ölkələrinin müvafiq təşkilatları ilə əməkdaşlıq əlaqələrinə mühüm əhəmiyyət verdiyini, ötən illərdə Təşkilatın bu istiqamətdə fəaliyyətinin daha səmərəli qurulduğunu vurğulamış, göstərilən məsələlərdə fəallığı xalqlarımızın birgə tarixi keçmişi, bu ənənələrin yaşadılmasının mühüm əhəmiyyət kəsb etməsi ilə əlaqələndirmişdir.
 
Konfransda digər çıxışlarda da tarixi saxtalaşdıranlara qarşı mübarizənin gücləndirilməsinin əhəmiyyəti qeyd olunmuş və bununla bağlı dünya ölkələrinin veteran təşkilatlarına müraciət qəbul edilmişdir.
 
Qurultayda Təşkilatı məsələlərə də baxılmış, müzakirə edilən məsələlər barədə yekdil qərar qəbul olunmuşdur. Respublika Veteranlar Təşkilatının sədri general-polkovnik Tofiq Ağahüseynov Müstəqil Dövlətlərin Veteranları İctimai Təşkilatları Birliyinin Rəyasət Heyətinin üzvü seçilmişdir.
 
www.moderator.az
 
 

20.11.2017. Rusiyanın XİN rəhbəri Sergey Lavrov Bakı səfərində Avrasiya İttifaqı (Aİ) ilə bağlı maraqlı bəyanatla çıxış edib. Belə ki, Lavrov Azərbaycanı bu qurumda görməkdən məmnun olacaqlarını bildirib.

 
Maraqlıdır, Azərbaycanın Aİ-ə üzv olması ölkəmizə nə verə bilər? İndiki məqamda ölkəmizin bu quruma üzv olması milli maraqlarıma nə dərəcədə uyğundur?
 
Moderator.az-a açıqlama verən politoloq Fikrət Sadıqov hazırda bu qurumda üzvlüyə ehtiyac duymadığını vurğuladı:
“Biz xarici siyasətimizdə balanslı addımlara üstünlük veririk. Biz heç bir qütbə söykənmir, heç bir bloka daxil olmuruq. Hazırda ölkəmizin Aİ-yə üzv olmağımız bizim maraqlarımıza o qədər də uyğun deyil. Bizim Rusiya ilə münasibətlərimiz normaldır. Aİ-yə daxil olan Belarus, Qazağısdanla da  münasibətlərimiz kifayət qədər yaxşıdır.
Azərbaycan inkşaf etmiş regional dövlətə çevrilib. Ölkəmiz böyük layihələr reallaşdırır. 
Onuda unutmayaq ki, Aİ-nin bir üzvü də Ermənistandır. Əgər biz bu quruma üzv olsaq, o zaman Ermənistana da müəyyən şərait yaratmalıyıq. Belə olarsa, Ermənistan bizim bəzi layihələrimizdən istifadə edə bilər. Bu, bizə lazımdırmı? Hesab edirəm ki, indiki mərhələdə buna ehtiyac yoxdur. 
Yaxın gələcəkdə Qarabağ problemi həll olunsa, Ermənistan işğal etdiyi torpaqlardan çıxsa, bu barədə düşünmək olar. Indiki halda isə bu quruma üzv olmaq fikrimcə, maraqlarımıza o qədər də uyğun deyil”.
 
 
 

 20.11.2017. "Türkiyə prezidenti Rəcəb Tayyip Ərdoğan rusiyalı həmkarı Vladimir Putinlə Soçidə Dağlıq Qarabağ münaqişəsinin nizamlanmasını ancaq təkbətək görüşdə müzakirə ediblər".

 
Bunu APA-nın Moskva müxbirinə açıqlamasında Türkiyənin Rusiya Federasiyasındakı fövqəladə və səlahiyyətli səfiri Hüseyn Diriöz bildirib.
 
O, noyabrın 13-də Soçidə Ərdoğanla Putin arasında yalnız təkbətək görüşdə Dağlıq Qarabağ münaqişəsinin nizamlanması yollarının müzakirə olunduğunu söyləyib: "Bildiyiniz kimi Türkiyə və Rusiya dövlət başçıları Soçidə təkbətək və geniş tərkibdə görüşlər keçiriblər. Geniş tərkibdə görüşdə Qarabağ problemi müzakirə olunmayıb".
 
Türkiyəli diplomat prezident Ərdoğanın təkbətək görüşdə Dağlıq Qarabağ probleminin həllinin regionun inkişafı üçün vacibliyini Putinin nəzərinə çatdırıb: "Türkiyənin bu məsələdə mövqeyi bəllidir. Biz, bu problemin Azərbaycanın ərazi bütövlüyü çərçivəsində həllinin tərəfdarıyıq. Münaqişənin həllinin bütünlükdə regionun inkişafına müsbət təsir edəcəyinə əminik".
 
H.Diriöz noyabrın 22-də Türkiyə prezidenti R.T.Ərdoğanın yenidən Rusiya səfər edəcəyini qeyd edib: "Bu dəfə Soçidə Türkiyə, Rusiya və İran prezidentlərinin iştirakı ilə üçtərəfli görüş keçiriləcək".
 
www.apa.az
 
 

 20.11.2017. Rusiyanın xarici işlər naziri Sergey Lavrov Yerevana gedib.

 
Moderator.az “Sputnik”ə istinadən xəbər verir ki, ermənistanlı həmkarı Edvard Nalbandyan Lavrovu qucaqlayaraq elə hava limanındaca qarşılayıb.
 
Hava limanından Lavrov erməni “soyqırımı” abidəsinin ziyarətinə yollanıb.
 
www.Moderator.az

20.11.17. Gültəkin Məlik qızı Əsgərova 1960-cı il noyabrın 20-də Bakı şəhərində anadan olub. O, peşəkar həkim kimi 1992-ci il aprelin 4-də könüllü olaraq cəbhəyə gedib, Turşsu, Şuşa, Laçın, Qubadlı və digər yerlərdə əsgərlərə tibbi yardım göstərib, onlarla insanın həyatını xilas edib, 1992-ci il iyunun 20-də Aranzəmin-Naxçıvanik istiqamətində gedən döyüşdə həlak olub. 1993-cü il noyabrın 20-də Milli Qəhrəman adı verilib. Bakı şəhərində Şəhidlər Xiyabanında dəfn edilib. Oxuduğu 200 saylı məktəb, Xəzərdə üzən gəmilərdən biri onun adını daşıyır, Bakı şəhəri Nərimanov rayonunda büstü qoyulub.

 

 

QAT.az