Çərşənbə, 20 Sentyabr 2017

28.07.2017.

 

 

İsrail olayların daha da böyüməməsi üçün geri çəkildi, ancaq Türkiyə ilə münasibətlər yenidən zərbə aldı


İyulun 14-dən başlayan Qüds gərginliyi rəsmən başa çatıb. İyulun 27-də İsrail radiosuna açıqlama verən Qüds müftisi Şeyx Məhəmməd Hüseyn böhranın başa çatdığını, müsəlmanların ibadət üçün "Əl-Əqsa" məscidinə gələ biləcəyini deyib. Eləcə də müsəlmanları Qüdsdə "Əl-Əqsa"da namaz qılmağa çağırıb.


Sputnik radiosunun xəbərinə görə, "Əl-Əqsa" Vəqfinin rəhbəri Əbdüləzim Salhab İsrail hökumətinin "Əl-Əqsa" məscidinin girişində quraşdırılmış elektron yoxlama cihazlarını (metal detektorları ) götürüb. Ümumi toplantı keçirən dini liderlər boykotun başa çatdığını bildirib və etiraz edənləri təqdir ediblər.

 

 

Related image

 


Xatırladaq ki, hadisə 14 iyulda "Əl-Əqsa" məscidi yaxınlığında iki israilli polisin öldürülməsi ilə başlayıb. Daha sonra İsrail hökuməti məscidin girişinə metal detektorlar yerləşdirib. Bu hadisə ərəblərin etirazına səbəb olub, baş verən qarşıdurma nəticəsində 3 fələstinli öldürülüb. "Əl-Əqsa" məscidi son 50 ildə ilk dəfə olaraq Cümə namazına qapadılıb. Sonrakı günlərdə Qüds və Fələstinin digər bölgələrində baş verən toqquşmalarda 4 fələstinli və 3 yəhudi öldürülüb.


Ancaq həmişə olduğu kimi, bu hadisə İsrail və müsəlman aləmi arasında münasibətləri yenidən gərginləşdirdi. Maraqlıdır ki, bu dəfə də ərəb ölkələri deyil, ərəb olmayan müsəlman ölkələri Qüds problemində daha ciddi fəallıq göstərib. Və növbəti dəfə Türkiyə və İsrail arasında gərginlik yaranıb. Ötən həftə Türkiyə prezidenti Ərdoğan Qüds olaylarını, "Əl-Əqsa" məscidinin namaza qapadılmasını pisləyib. Ərdoğan İslam Əməkdaşlıq Təşkilatının dönəm sədri olaraq Qüds gərginliyini qınadıqdan sonra İƏT qurumları, o cümlədən İKT Gənclər Forumu bəyanat verib, daha sonra Qüdsü 2018-ci il üçün İslam Gənclər Paytaxtı elan edib.

 

 

Image result for Benyamin Netanyah

 


Ancaq Türkiyənin bu reaksiyası İsraildə qəzəblə qarşılanıb. İsrail XİN-in yaydığı bəyanatda Türkiyənin İsraili qınamasına sərt təpki verilib. “Osmanlı imperatorluğu arxada qaldı. Qüds keçmişdə də yəhudi xalqının paytaxtı olub, indi də elədir, gələcəkdə də olacaq” kimi ifadələrin yer aldığı bəyanatda Türkiyə prezidentinə öz ölkəsinin daxili işləri ilə məşğul olması “məsləhət görülür”. Oxşar sərt reaksiyanı baş nazir Benyamin Netanyahu da göstərib. Buna qarşı olaraq Türkiyə XİN İsrail XİN-in açıqlamasını “həddini aşan” ifadə kimi dəyərləndirib.


Britaniya mətbuatı isə Ərdoğanın açıqlamalarının bölgədə gərginliyi daha da artıracağını iddia edib. “Guardian” qəzeti yazıb ki, İsrailə qarşı ittihamları təhrikedicidir. Məsələ ondadır ki, Türkiyənin təpkisi İsrail üçün ciddi narahatlığa səbəb olub. Çünki məlum olduğu kimi, faktiki olaraq ərəb ölkələri Qüds mövzusunda səslərini çıxarmadılar, daha doğrusu, onların bəyanatları İsraili narahat etmir. Çünki ərəb ölkələrinin narahatlığı daha çox öz daxili vəziyyətləri ilə bağlı idi. Ərəb rejimləri Fələstin olaylarının daha da böyüyüb ərəb ölkələrinə yayılmasından narahatdır, digər tərəfdən, İsrailə qarşı etirazların böyüməsi istər-istəməz mövqe qoymağı tələb edəcək. Ərəb rejimləri isə İsraillə toqquşmağa hazır deyillər. Çünki hazırda onların başı daxili işlərə qarışıb və heç bir ölkə İsrail kimi güclü ölkə ilə qarşı-qarşıya gəlmək istəmir.


Bu səbəbdən də növbəti dəfə Qüds və Fələstin mövzusu Türkiyə və İsraili qarşı-qarşıya gətirdi. Halbuki iki ölkə arasında münasibətlər 7 il əvvəl pozulmuşdu və yalnız ötən il uzun müddət davam edən danışıqlardan sonra normallaşmaya dönmüşdü. Türkiyənin ərəb-müsəlman aləminin lideri kimi çıxış etməsi onu həm də İsrail kimi ölkə ilə üz-üzə gətirir. Baxmayaraq ki, iki ölkə arasında həm də Aralıq dənizində yeni ortaq qaz layihələri var. Ancaq Türkiyənin islamçı kimliyindən çıxış etməsi yenidən münasibətlərə soyuqluq gətirir. İsrailin hökumət səviyyəsində sərt reaksiyası və ardınca etirazlar qarşısında geri çəkilməsi onu göstərir ki, Təl-Əviv Qüdsdə etirazların şiddətlənməsini və bu ərəfədə ərəb-müsəlman aləmi ilə qarşı-qarşıya gəlmək istəmir.


Türkiyəyə qarşı qəzəbin bir səbəbi də məhz budur. Çünki indiki mərhələdə ərəb dünyasında onsuz da ciddi narahatlıq var. İnsanlar uzun illərdir davam edən daxili müharibələr, Fələstin və Qüds məsələsində irəliləyişin olmamasından narazıdır. Bu səbəbdən də ilk kiçik bir etiraz böyük rezonans doğurdu və böyük bir qəzəb partlayışına çevrildi. İsrail dövləti məhz bu səbəbdən hadisələrin daha da böyüməsinin qarşısını aldı.


Ancaq olaylar sakitləşmiş kimi görünsə də, problem həllini tapmayıb və istənilən anda yenidən partlayışa çevrilə bilər. İkinci tərəfdən, bu hadisə Ankara-Təl-Əviv münasibətlərini yenidən yaraladı. İsrail geri çəkilmiş kimi görünsə də, Türkiyəyə qarşı incikliyini qoruyub saxlayacağı aydındır.


Kənan RÖVŞƏNOĞLU

27.07.2017.

 

 

Kremlin “gizli adamı” üzə çıxdı; Rusiya prezidenti sabiq vitse-primyerə niyə indi təşəkkür məktubu yazıb?; Moskva-Bakı münasibətlərini korlamaq səyləri və bu planda Abbas Abbasovun yer alacağı barədə iddialar doğruldu, bəs...


Azərbaycanın baş nazirinin sabiq birinci müavini Abbas Abbasovun son aylar yenidən fəallaşması barədə “Yeni Müsavat”ın yazdığı xəbərlər təsdiqlənir. Məlumatlarda qeyd olunurdu ki, Moskvadakı və Bakıdakı tərəfdarlarını başına toplamaq işinə girişən A.Abbasov 2018-ci ildə mütləq Azərbaycana qayıdacağı və seçkilərdə iştirak edəcəyi mesajını verib.


Sabiq vitse-primyer tərəfdarlarına deyib ki, Kreml hələ də ona etimad edir və yenidən önə çıxacaq. Onun Rusiya regionlarındakı keçmiş tərəfdarlarını da Moskvadakı gizli ofisinə toplayaraq təlimatlandırdığı deyilirdi. İndi məlum olur ki, A.Abbasovun doğrudan da hələ Kremldə “etimad”ı qalırmış.


Leonid Şvets Şimali Qafqazda dislokasiya olunmuş 58-ci Rusiya ordusunun Gürcüstanın separatçı Cənubi Osetiya bölgəsi də daxil olmaqla, 7 günlük təlimlərə başlaması barədə haqqin.az saytında maraqlı məqalə ilə çıxış edib.

Müəllif bu təlimləri Kremlin qonşularına, o cümlədən Azərbaycana təzyiqi kimi qiymətləndirir. Onun fikrincə, Rusiya Azərbaycana təzyiq kimi “Abbas Abbasov kartı”ndan istifadə edə bilər: “Azərbaycanda isə Rusiyanın müəyyən dairələrinin Moskva-Bakı münasibətlərini korlamaq səyləri ilə bir vaxtda çoxdan yaddan çıxmış Abbas Abbasov, Azərbaycanın eks vitse-premyeri gözlənilmədən ”zühur edib". Kreml gözlənilmədən və heç bir formal səbəb olmadan ona “uğurlu sahibkarlıq fəaliyyəti”nə görə təşəkkür məktubu göndərib. Həmin məktub barədə Kremlin saytında heç nə deyilmir, ancaq Rusiya Azərbaycanlılarının Federal Milli Muxtariyyəti öz saytında bu haqda geniş yazıb, Abbas Abbasovun fəaliyyətini mədh edib".

 

 

Image result for Abbas abbasov

 


“Yeni Müsavat” xəbər verir ki, Rusiya Azərbaycanlılarının Federal Milli Muxtariyyətinin rəsmi saytı olan fnkaa.ru-da həqiqətən də belə bir məktub yerləşdirilib. Kremlin mətbuat xidmətinə istinadən yayılmış məktubda deyilir: “Kremlin mətbuat xidməti Rusiya prezidenti Vladimir Putininin Sahibkarlığa Dəstək Fondunun direktoru Abbas Abbasova fəal ictimai fəaliyyətinə və Rusiyada sahibkarlığın inkişafına göstərdiyi dəstəyə görə təşəkkür edib. Rusiya dövlətinin başçısı və hökuməti ölkədə çətin iqtisadi dövrdə Abbas Abbasovun biznesin inkişafında xidmətini lazımınca qiymətləndirir. Bu, Abbas Abbasovun fəaliyyətinə verilən yüksək və layiqli qiymətdir”.

 

 

Image result for Mehriban Sadıqova

 

 

Putinin təşəkküründən “AzerRos”un prezidenti Mehriban Sadıqova geniş məktub hazırlayıb və A.Abbasovun Rusiya-Azərbaycan əlaqələrinin inkişafında fəaliyyəti geniş təhlil olunub. Məktubda diqqətçəkən bir məqam da var. “AzerRos”un prezidenti yazır ki, “Rusiya prezidentinin Abbas Abbasova məktubu ona və onun əqidə dostlarına ciddi mənəvi dəstəkdir”.

 

 

Image result for Putin

 

 

 


Hələ ötən ilin oktyabrında A.Abbasovun “AzerRos” Federal Milli Mədəni Muxtariyyətinin rəhbərliyində siyasi fəaliyyətini dayandırması barədə xəbər yayılanda bu, sabiq vitse-primyerin gələcək planının bir hissəsi kimi izah olunurdu. Çünki A.Abbasov xarakterində olan adamın “siyasət meydanından” birdəfəlik çəkilməsi ağlabatan deyildi, bu, yeni bir plan üçün vaxt qazanmaq şansı idi. A.Abbasov gizli fəaliyyətə üstünlük versə də, ÜAK-ın qeydiyyatı ilə bağlı problem ortaya çıxan kimi ona yaxın adamlar da ortada görünməyə başladılar. Onlar ÜAK-ın ləğvi üçün Rusiya Ali Məhkəməsinin bütün “əsasları” olduğunu açıq bəyan edirdilər. Aydın idi ki, bu məsələdə bir dəfə də səsinin çıxarmayan “diaspor ağsaqqallı” ÜAK-ın probleminin əslində haradan qaynaqlandığını yaxşı bilirdi və gec-tez özü də yeni bir oyunda görəv alacaqdı.

 

 

Image result for Seçkilər 2018

 

 


Oğlunun son deputat seçkilərində iştirakı əngəllənəndən sonra bütün ailəsini Bakıdan çıxaran Abbas Abbasov 2018-ci il seçkiləri ərəfəsində Rusiyadakı qüvvələrin maraqlarına ən uyğun fiqur idi. Birincisi, ona görə ki, iqtidarla bütün körpüləri yandıran A.Abbasovun itirəcəyi heç nə qalmayıb. İkincisi, sabiq baş nazir müavinin anti-Azərbaycan planında həmişə yer ala biləcək xislətidir.

 

 

kollaj manshet 27 iyul esas.jpg (2.36 MB)


A.Abbasovun Putinin məktubu ilə “siyasətə yenidən qayıdışı” reallaşdı. Rusiyanın müəyyən dairələrinin Moskva-Bakı münasibətlərini korlamaq səyləri və bu planda Abbas Abbasovun yer alacağı barədə iddialar doğruldu. Abbas Abbasov necə, özünü yeni “istifadədə” doğrulda biləcəkmi?

 

 

Image result for Kreml

 


Xatırladaq ki, 2013-cü ilin prezident seçkiləri ərəfəsində də Abbas Abbasov fəallaşmışdı. Onun “xeyir-duası” və şəxsi təşəbbüsü ilə yaradılan Milli Şura projesi əslində ölkəmizə qarşı yönəlmiş xain bir plan idi. Təəssüf ki, özünü qərbyönümlü elan edən Azərbaycan müxalifətinin böyük qismi A.Abbasovun və dolayısı ilə Kremlin bu planına ciddi dəstək verdi. Yəqin Rusiya özünün siyasətdə kamuflyaj olunmuş qüvvələrini yenidən anti-Azərbaycan planında alət etməyə hazırlaşır.


“YM”

26.07.2017.

.

 

Bu gün daha bir aprel Şəhidimiz gizir Elimdar Səlimxan oğlu Səfərovun doğum günüdür. Elimdar Səfərov 1992-ci il iyulun 26-da Yardımlı rayonunda anadan olub. 1993-cü ildə ailəsi ilə birlikdə Neftçala rayon Aşağı Qaramanlı kəndinə köçüb. Gizir Elimdar Səfərov aprel döyüşləri zamanı qəhrəmancasına Şəhid olub. Bu gün Şəhid gizirimizin 25 yaşı tamam olur. Şəhid gizirimiz ölkə başçısı tərəfindən “Hərbi xidmətdə fərqlənməyə görə” üçüncü dərəcəli medalı ilə təltif edilib. 
 
Şəhidimizin qardaşı Elizbar Səfərov Moderator.az-a açıqlamasında bildirib ki, Neftçalanın Aşağı Qaramanlı kəndində Şəhidimizin şərəfində salınmış “Şəhidlər Parkı”nın açılışı olacaq:
 
“Bir ildir ki, parkın salınması üçün iş gedir. Biz ilk olaraq kənd məscidimizi Elimdarın şərəfinə təmir edərək, məscidin həyətində onun büstünü qoyduq. Bizim qəbristanlıq məscidimizin həyətindədir. Elimdar da həmin qəbristanlıqda dəfn edilib. Məscidin təmir edilməsi Elimdarın çoxdankı arzusu idi, biz onu Elimdarın Şəhid olmasından sonra gerçəkləşdirdik. İyulun 29-da Elimdarın şərəfinə salınmış “Şəhidlər Parkı”nın açılşı olacaq. Bu tədbirə hamını dəvət edirəm. Bu günə kimi göstərdikləri diqqətə görə xalqıma minnətdarlıq edirəm, onlar bizi heç zaman tək qoymadılar. Bu gün Elimdarın 25 yaşı tamam olur”. 
 
 
 
 
 
 
 

27.07.2017.


 

 

Rusiya prezidenti Vladimir Putin Ermənistanla birgə hərbi birləşmələr haqqında sazişi imzalayıb.
 
TASS xəbər verir ki, iki ölkə arasında müvafiq sənəd 2016-cı il, noyabrın 30-da Moskvada imzalanıb.
 
İyulun 19-da Rusiya Federasiya Şurası adıçəkilən sazişi ratifikasiya edib. 

26.07.2017.

 

 

Əli Əliyev: “Gələn ayın 1-də başlanacaq təlimlər üçün 10 gün öncədən Bakıya üzməyə nə ehtiyac vardı?!”


Rusiya Hərbi Dəniz Donanmasının Xəzər flotiliyasının “Qrad Sviyajsk” kiçik raket gəmisi və “SB-45" xilasetmə yedək gəmisi iyulun 23-də Bakıya gəlib. Azərbaycan Müdafiə Nazirliyi xəbər verir ki, gəmilərin səfəri Azərbaycanın Xəzər dənizindəki ərazi sularında keçiriləcək ”Dəniz Kuboku-2017" beynəlxalq yarışlarında iştirak etmək məqsədi daşıyır. Azərbaycan, Rusiya, İran və Qazaxıstan hərbi gəmilərinin iştirak edəcəyi yarışlar avqustun 1-dən 11-dək keçiriləcək.


Xatırladaq ki, bu, Rusiya hərbi gəmilərinin son illərdə Bakı sahillərinə ilk gəlişi deyil. Keçən ilin sentyabrında Rusiya Federasiyası Xəzər Dəniz Donanmasının komandanı, kontr-admiral Sergey Pinçukun rəhbərliyi ilə “Uqliç” kiçik raket gəmisinin Bakıya rəsmi səfəri olmuşdu. Rusiya nümayəndə heyəti Azərbaycan Respublikası Hərbi Dəniz Qüvvələri Komandanlığı ilə görüşmüş, Heydər Əliyev adına Azərbaycan Ali Hərbi Məktəbində olmuş, eləcə də “ADEX-2016" 2-ci Beynəlxalq Müdafiə Sərgisində iştirak etmişdilər. Gəminin şəxsi heyəti mədəni və tarixi abidələrlə tanışlıq məqsədilə Bakıda gəzintiyə çıxmaqla yanaşı, futbol üzrə yoldaşlıq görüşü də keçirmişdilər.


2013-cü ilin avqust ayında isə Rusiya prezidenti Vladimir Putin Azərbaycana rəsmi səfərə hərbi gəmi ilə gəlmişdi. O vaxt bu, ekspertlər tərəfindən birmənalı qarşılanmamışdı. İndi Rusiya hərbi gəmisi yenidən Azərbaycana gəlib. Bu dəfə isə beynəlxalq yarış məqsədilə gəldiyi rəsmi məlumatlarda deyilir.


Bu hadisəni yalnız yarış məqsədli tədbir saymaq olarmı? Yoxsa siyasi, hərbi mesajları da özündə daşıyır?


Vətəndaş və İnkişaf Partiyasının sədri Əli Əliyev hesab edir ki, gəmilərin gəlişi idman tədbiri ilə əlaqəli gəliş kimi əsaslandırılsa da, Xəzəryanı ölkələrdən məhz Azərbaycanın seçilməsinin özü suallar yaradır. Əli Əliyev qeyd etdi ki, burada şübhəsiz siyasi məqamlar və mesajlar kifayət qədərdir: “Rusiya donanması gəmilərinin imperiyanın Andreyev bayraqları altında Bakı buxtasına son gəlişi 2013-cü il prezident seçkiləri zamanı baş tutmuşdu. Nəzərə alaq ki, dövlətlərin sahil sularına daxil olan zaman gəmilərin bayraqlarının endirilməsi beynəlxalq sazişlərdə təsbit olunmuş normadır. Lakin o günlərdə ruslar bunu etməmişdilər.”


Partiya sədri xatırlatdı ki, o zaman da Bakı limanına Rusiya hərbi gəmilərinin lövbər atmasının səbəbi kimi hansısa təlimləri göstərirdilər: “Hesab edirəm ki, bu, idman tədbiri pərdəsi altında əzələ nümayişi məqsədi güdə bilər. Gəmilərin də gəlişini bununla izah etmək olar. Yoxsa gələn ayın 1-də başlanacaq təlimlər üçün 10 gün öncədən Bakıya üzməyə nə ehtiyac vardı? Niyə məhz Bakıya, Ənzəliyə, yaxud Qazaxstan limanlarına deyil? Maraqlıdır, deyilmi? Bax bu sualların cavablarında çox məsələlər yatır”.


E.SEYİDAĞA

QAT XƏBƏR